Presidenti Ilir Meta ka dalë me një paralajmërim të fortë për zgjedhjet e 25 prillit. Në një postim në Facebook Meta shkruan se pas zgjedhjeve nuk do të hetohen vetëm krimet zgjedhore, por në veçanti edhe mos-hetimi i krimeve zgjedhore dhe policore para datës së zgjedhjeve. Presidenti shkruan se nuk ka asnjë sekondë për t’u dekurajuar dhe nesër do të jetë festa e demokracisë.
Statusi i plotë i Metës:
Pas zgjedhjeve nuk do të hetohen vetëm të tëra krimet zgjedhore por në veçanti do të hetohet mos-hetimi i krimeve zgjedhore dhe policore para datës së zgjedhjeve. Asnjë sekondë për të humbur për dekurajimin dhe parandalimin e krimeve të reja.
Nesër do të jetë Festa e Demokracisë! 🇦🇱
Ditën e nesërme do të mbahen zgjedhjet e radhës parlamentare në Shqipëri në një situatë të pazakontë të pandemisë. Partia Socialiste kërkon një mandat të tretë në krye të vendit, ndërsa PD kërkon të rimarrë qeverisjen pas 8 vitesh në opozitë. Tensionet zgjedhore dhe akuzat nga të dyja palët janë të shumta, ndërsa fushata degradoi edhe në vrasje në Elbasan, ku mbeti viktimë Pjerin Xhuvani. Ditët e fundit kandidatë të Partisë Demokratike kanë ndaluar në rrugë makina për të cilat pretendonin se po shpërndanin para në këmbim të votave.
