Prej ditësh IGJEUM ka dhënë alarmin se moti i keq do të përkeqësojë situatën hidrometeorologjike në të gjithë territorin e vendit, ku sipas saj zonat më problematike do të jenë në zonën e Shkodrës, Fierit dhe Vlorës.
Për shkak të intesitetit të reshjeve, priten shkarkime të mëdha nga HEC-et dhe për pasojë parashikohet të ketë përmbytje në zonën e Shkodrës. Ndërkohë që për shkak të reshjeve të mëdha ditën e sotme disa lumenj kanë dalur nga shtrati si dhe në disa zona ka patur rrëshkitje dherash.
Pas këtyre paralajmërimeve Presidenti i Republikës së Shqipërisë, Ilir Meta i ka bërë thirrje Qeverisë, ministrive përgjegjëse, prefekturave si dhe bashkive përkatëse në zonat me rrezikshmëri të lartë përmbytjesh, që të marrin në konsideratë disa paralajmërime serioze.
Sipas Presidentit Meta, institucionet përgjegjëse duhet patjetër që të garantojnë informacion transparent, rezerva të mjaftueshme ushqimore, si vendosjen në gatishmëri dhe dispozicion të strukturave të koordinimit dhe menaxhimit të operacioneve të shpëtimit.
Apelit të Presidentit Meta, i është përgjigjur Ministria e Bujqësisë. Ministrja Milva Ekonomi, për shkak të situatës nga reshjet intensive, ka ftuar në takim të drejtuesve të DRUK, që mbulojnë të gjithë infrastrukturën ujore në vend.
Në takim, Ekonomi ka bërë me dije se ka kërkuar prej tyre që të mos ndërpritet energjia elektrike, pasi në të kundërt do të kishte bllokim të ujit dhe rrjedhimisht edhe përmbytje.
“Thirra në takim DRUK që mbulojnë të gjithë infrastrukturën ujore të vendit, për përballimin e kësaj periudhe intensive me reshje. Gadishmëri totale dhe koordinim me aktorët e tjerë lokal për të bashkrenduar punët.E rëndësishme është furnizimi pandërpreje i hidrovoreve me energji,” ka shkruar ministrja Ekonomi./Gazetareforma.com/
