Sot në orën 16:00 fillon protesta e organizuar nga ish-kryeministri Sali Berisha.
Pak minuta para orës së paralajmëruar të nisjes së protestës, në oborrin e PD janë mbledhur edhe protestuesit e parë kundër vizitës së Presidentit serb Aleksandar Vuçiç në Tiranë në kuadër të “Open Balkan”.
Por kjo protestë nuk është vetëm kundër vizitës së Vuçiç, por edhe për aferën e inceneratorëve, që çoi në pranga një ish-ministër. Sipas organizatorëve, mësohet se Berisha do iu drejtohet protestuesve me një fjalim para nisjes për tek Kryeministria, më pas do të marshojnë për në bulevard.
Berisha ka deklaruar se kjo do të jetë vetëm protesta e parë, duke paralajmëruar se hapi radhës i tyre janë protestat e njëpasnjëshme kombëtare, deri në rrëzimin e qeverisë së kryeministrit aktual, Edi Rama.
Kujtojmë që ditën e sotme Sekretari i Përgjithshëm i PD-së, Gazment Bardhi deklaroi se selia e PD-së ditën e sotme, e cila do të bëhet stacion i nisjes së një proteste të organizuar nga ish-kryeministri Sali Berisha, nuk do të mbrohet nga policia.
Bardhi, theksoi se PD ngelet e hapur për demokratët, duke shtuar se i vetmi armik për ta është Edi Rama.
“Meqë më kujtuat policinë, jeni dëshmitar të asaj që u tha para se kemi mbushur selinë me gardistë, FNSH, forca speciale, operacionale dhe marinsa. Ndërkohë ju keni qenë këtu dëshmitarë, s’keni parë as polici, as gardh. Nuk kemi njoftuar policinë. PD mbetet e hapur për demokratët. Nuk ka kjo seli asnjë frikë nga asnjë demokrat. E kam bindjen. Cilido që përpiqet me gënjeshtra që të vendosë demokratët përballë njëri-tjetrit, është gabim i madh. Ne duhet të jemi të bashkuar përballë një armiku të vetëm; Edi Ramës. Ai që me gënjeshtra iu thotë demokratëve se ka marrë gardën brenda dhe ka policë brenda, nxit dhunën. A mund të ketë demokratë që mund të konfliktohet me një demokrat tjetër që mendon ndryshe?! Kurrsesi. Ai që e mendon, del zbuluar para demokratëve se nuk ka hallin e tyre por hallin e vetë personal.”, pohoi demokrati.
