Kryedemokrati Lulzim Basha është gjobitur dy ditë më parë për shkeljen e rregullave të parandalimit të përhapjes së Covid-19, pasi zhvilloi një takim në një lokal me disa persona në Durrës.
Policia në një njoftim për mediat ka bërë me dije se Bashës i është marrë dhe patenta e po kështu është vepruar dhe me personat e tjerë që ishin në takim.
LEXO: Policia procedon kreun e PD-së Lulzim Basha
Mirëpo, kjo nuk e ka ndaluar kreun e PD të vijojë takimet e tij, pasi ai ka shkuar këtë të shtunë në Divjakë dhe Karbunarë, ku ka zhvilluar takime me banorët dhe fermerët, me të cilët ka ndarë shqetësimin për situatën e rënduar në sektorin e bujqësisë.
Përmes një mesazhi në “Facebook”, ku publikon edhe foto nga takimet, Basha thekson se “Ramavirusi ka prekur rëndë çdo qelizë të ekonomisë, përfshirë dhe bujqësinë dhe agrobiznesin”.
Mesazhi i Bashës:
Me banorët dhe fermerët e Divjakës dhe Karbunarës ndamë shqetësimin për situatën e rënduar në sektorin e bujqësisë.
RAMAVIRUSI ka prekur rëndë çdo qelizë të ekonomisë, përfshirë dhe bujqësinë dhe agrobiznesin. Asnjë ndihmë konkrete nuk është dhënë deri më sot për këtë sektor që si e gjithë ekonomia po vuan pasojat e pandemisë ekonomike të qeverisë Rama.
Fermerët janë të shqetësuar për koston e shtuar të prodhimit dhe konkurencën e pandershme nga produktet e importit të cilat vijnë të subvencionuara nga vendet e origjinës. Produktet e tyre edhe pse shumë cilësore kalben ose groposen bashkë me investimin dhe djersën e tyre.
Ekonomia shqiptare është në krizë të thellë, papunësia po rritet çdo ditë, konsumi është në kolaps dhe njerëzit kanë çdo ditë e më pak mundësi për të blerë.
Bujqësia shqiptare dhe fermerët përballen me falimentim ekonomik, sepse edhe para pandemisë nuk kishin asnjë mbështetje. Sot ata kanë nevojë për përkrahje financiare dhe masa konkrete e jo fjalë boshe në facebook.
Pandemia ekonomike e shkaktuar nga RAMAVIRUSI po godet dhe rrënon fermerët e lënë krejtësisht pa mbështetje.
https://www.facebook.com/lulzimbasha.al/posts/3166980533353106
