Papa Françesku ka ndërruar jetë si pasojë e një goditjeje cerebrale që çoi në koma dhe më pas në dështim të pakthyeshëm të zemrës. Lajmi është konfirmuar nga Vatikani, i cili publikoi certifikatën zyrtare të vdekjes, rreth 12 orë pas ndarjes nga jeta të Atit të Shenjtë.
Sipas të dhënave zyrtare, Papa vuante prej kohësh nga një sëmundje kronike të mushkërive, e cila kishte lënë pasoja të rënda në shëndetin e tij. Në moshën 21-vjeçare, ai kishte pësuar një pneumoni të rëndë, që solli nevojën për një ndërhyrje kirurgjikale, ku iu hoq pjesa e sipërme e mushkërisë së djathtë.
Shëndeti i tij ishte përkeqësuar ndjeshëm në muajt e fundit, veçanërisht pas një episodi të rëndë të frymëmarrjes më 14 shkurt, që e çoi Papën në spitalin Gemelli. Aty ai qëndroi për 38 ditë nën kujdes intensiv mjekësor.
Pavarësisht gjendjes së rënduar, Papa Françesku u shfaq në publik të dielën e Pashkëve, vetëm një ditë para vdekjes së tij, për të dhënë bekimin tradicional për mijëra besimtarë të mbledhur në sheshin e Shën Pjetrit.
Ndarja nga jeta e Papës shënon fundin e një epoke të rëndësishme për Kishën Katolike dhe komunitetin ndërkombëtar, që do të kujtojë figurën e tij si një udhëheqës shpirtëror me ndikim të madh.
