Papa Françesku pritet të lërë sot spitalin “Xhemeli” në Romë, ku ishte shtruar që prej datës 14 shkurt për shkak të vështirësive në frymëmarrje. Sipas mjekëve, 88-vjeçarit do t’i duhen edhe dy muaj pushim për të përfunduar rikuperimin e plotë.
Në fillim, Papa u trajtua për bronkit, por më pas iu diagnostikua pneumoni në të dy mushkëritë. Gjatë qëndrimit të tij në spital, ai nuk ka qenë në gjendje të zhvillojë lutjen e përjavshme të së dielës në sheshin e Shën Pjetrit, e fundit prej të cilave u mbajt më 9 shkurt, përpara shtrimit.
Vatikani ka bërë të ditur se as këtë të dielë nuk pritet që Papa të mbajë lutjen, megjithatë është planifikuar që ai të dalë në dritare për të përshëndetur besimtarët. Gjatë kësaj periudhe, ekipi mjekësor i ka rekomanduar shmangien e takimeve në grup, sidomos me persona që mund të kenë kontakt me fëmijë, për të minimizuar rrezikun e ekspozimit ndaj infeksioneve të reja.
Mjekët kanë konfirmuar se Papa ka humbur peshë gjatë shtrimit, por kanë përjashtuar praninë e COVID-19 apo diabetit. “Papa nuk kishte Covid dhe nuk ka diabet,” deklaroi profesori Sergio Alfieri, duke sqaruar se ai ishte prekur nga disa viruse poli-mikrobike.
“Është e dukshme që Papa ka rënë në peshë, edhe pse ne nuk e kemi peshuar. Megjithatë kjo është normale dhe nuk na shqetëson. E rëndësishme për ne është që ai ka filluar të ushqehet në mënyrë progresive,” u shpreh ekipi mjekësor.
