Një fluturim i linjës Tiranë–Oslo i kompanisë ajrore Norwegian u detyrua të bënte një ulje emergjente në aeroportin e Splitit, Kroaci, pas një defekti teknik të regjistruar gjatë udhëtimit.
Sipas Skyweb.al, avioni me numër fluturimi DY1935 u devijua nga itinerari fillestar për shkak të një çarje në xhamin e kabinës, në anën e pilotit, si dhe një rënie të papritur të presionit në bord.
Ulja u krye me sukses dhe fatmirësisht asnjë nga pasagjerët apo anëtarët e ekuipazhit nuk pësoi lëndime. Situata u menaxhua pa pasoja, ndërsa të gjithë udhëtarët u evakuan në mënyrë të sigurtë.
Ky ishte incidenti i dytë brenda të njëjtës ditë për të njëjtin avion. Më herët, fluturimi DY1934 në drejtim të kundërt, Oslo–Tiranë, kishte devijuar drejt Berlinit për arsye që ende nuk janë bërë publike nga kompania.
Aktualisht, autoritetet përkatëse kanë nisur hetimet për të dy rastet, duke analizuar shkaqet teknike të ngjarjeve dhe duke verifikuar zbatimin e protokolleve të sigurisë nga ana e kompanisë ajrore.
Situata ka ngritur shqetësime lidhur me mirëmbajtjen teknike të avionëve të Norwegian, një prej linjave të përdorura gjerësisht nga udhëtarët shqiptarë.
