Skandali i bujshëm i “Pandora Papers”, ka zbuluar shumë skandale për politikanë, deputet ministra ish-ministra, miliarderë etj.
Ditën e sotme ka qenë e ftuar në emisionin “Open”, gazetarja e Birn, Aleksandra Bogdani e cila ka dhënë edhe detaje në lidhje me skandalin që ka prekur të gjithë botën. Bogdani ka treguar se burimi ka qenë anonim dhe ka kontaktuar me median dhe më pas kanë shkëmbyer informacionet. Po ashtu ajo ka theksuar se rrjedhja këtë herë është shumë më e madhe se “Panama Papers”.
“Burimi është anonim, të dhënat ofshore jo gjithmonë tregojnë se ka shkelje ligji, por fokusi jonë janë persona të lidhur me politikanë, ose politikanë, që janë në pushtet, sa morale dhe sa problem është qarkullimi i parasë. Në rastin e Panama Papers, një personazh kontaktoi median, por nuk mundën t’i përpunonin dot vetë të gjitha. Dy gazetarët e një gazete shumë të madhe në Gjermani thanë hajde punojmë t’i shërbejmë interesit publik. Rrjedhja këtë herë është shumë më e madhe se sa Panama Papers. 12 zyra në vende të ndryshme të botës, por puna vijon. Qëllimet mund të jenë të ndryshme, por sa transparente është media në verifikimin e tyre. Janë mediat më prestigjioze të botës. Gazetarët kanë për detyrë të masin opinionin publik.”, ka thënë gazetarja.
Ndër të tjëra gazetarja ka thënë se gazetarët kanë shkëmbyer dokumente me njëri-tjetrin, për të verifikuar nëse ato të dhëna kanë lidhje.
“Kemi shkëmbyer dokumente për të verifikuar nëse ato të dhëna kanë lidhje, kemi publikuar një shkrim pasi arritëm të kemi një interes. Me sa jam në dijeni ka disa kompani. E rëndësishme është që të dhënat të kenë një interes publik. Shkrimet kryesore bëhen në fillim se ka me javë të tëra që po punohet. Ka disa muaj dhe kjo ka ndodhur vazhdimisht, kur ka një kod bashkëpunimi, koordiniohet edhe koha e publikimit dhe fakti se askush nuk duhet të thotë se çfarë kam unë në duar. Nuk ka pasur rrjedhje nga 600 gazetarët në të gjithë botën”, tha Bogdani.
