Hoteleria ka qenë dega e sektorit turistik në vend që pësoi goditjen më të rëndë nga pandemia e koronavirusit.
Shumë hotele thuajse nuk punuar për muaj të tërë, ndërsa shumë të tjerë me gjithë përgatitjet, ofertat dhe çmimet e ulëta, u shërbyen vetëm pak klientëve.
Pandemia prekur fillimisht numrin e turistëve që prisnin për rezervime në strukturat akomoduese, duke u tkurrur ndjeshëm në raport me një vit më parë.
Referuar të dhënave zyrtare të INSTAT-it, qarkullimi i të ardhurave ra me 61.4% në 3-mujorin e dytë të këtij viti, në raport me të njëjtën periudhë të një viti më parë.
Rënia e xhiros lidhet drejtpërdrejt me praninë më të pakët të turistëve në hotele, kjo për shkak të kufizimeve të lëvizjes së lirë.
Turistët e vetëm që vizituan Shqipërinë këtë vit, ishin ata nga vendet fqinjë dhe polakët, por në fakt lëvizja e vërtetë nisi vetëm në fund të qershorit, kur vendi ynë hoqi tërësisht masat kufizuese.
Si rrjedhojë e pandemisë dhe kufizimit të udhëtimeve, shumë turistë të huaj anuluan udhëtimet, por dhe turizmi i brendshëm ndaloi, duke i vënë hotelet në vështirësi.
Statistikat
Indeksi i volumit në 3-mujorin e dytë 2020, shënoi një rënie 63%, në raport me 3-mujorin e dytë të vitit 2019.
Të dhënat e INSTAT-it, bënë të ditur se, numri i shtetasve të huaj që hynë në vendin tonë përgjatë 6-mujorit të parë të vitit 2020, është 781.894, duke rënë me 63,4%, në krahasim me të njëjtën periudhë të vitit 2019.
Pavarësisht situatës së vështirë strukturat hoteliere arritën që të mbanin në punë pjesën më të madhe të stafeve. Tkurrja e indeksit të punësimit në 3-mujorin e dytë ishte me 20%, në raport me 3-mujorin e njëjtë të një viti më parë.
Kjo lidhet me dy aspekte. Së pari shteti aplikoi një nga skemat e ndihmës që lidhej me “pagën minimale”, dhe së dyti, vetë strukturat hoteliere parashikonin që të kishin sezon veror dhe normalisht do t’ju duhej stafi i kualifikuar.
Stafet dhe pagat
Strukturat hoteliere në vend, megjithëse i kanë mbajtur punonjësit në punë, janë detyruar të shpenzojnë më pak për paga.
Indeksi i pagës është tkurrur me 24.2% në 3-mujorin e dytë të këtij viti sipas INSTAT-it, çka tregon se edhe ulja e pagave në raport me një vit më parë, ka qenë disi më e moderuar, po të kemi parasysh indekset e tjera që lidhen me aktivitetin ekonomik të strukturave hoteliere.
Sigurisht krahasimi i vitit aktual me atë të kaluar që ishte viti më i mirë i turizmit shqiptar, e bën edhe më pesimiste situatën.
Tremujori i tretë i vitit 2019, që është deri tani viti më i mirë historik për turizmin, regjistroi indeksin më të lartë ndonjëherë në vlerë, pra të të ardhurave të hoteleve, por edhe atë të volumit që tregon numrin e turistëve që vizituan këto struktura.
Indeksi i vlerës, me referencë vitin 2015, arriti në 300, çka nënkupton që qarkullimi i hoteleve në 3-mujorin e tretë të vitit 2019, ishte tre herë me i lartë se katër vjet më parë.
/Burimi: INSTAT/ GazetaReforma.com/
