Pandemia e koronavirusit në Shqipëri, ka qenë me “infektuese” dhe shkatërruese në të njejtën kohë për xhepat dhe ekonominë e shqiptarëve, se sa për shëndetin e tyre.
Kjo lloj “kolere ekonomike” ka lënë pa punë plot 48.7 mijë individë në Shqipëri, në krahasim me dhjetorin e vitit 2019.
Kjo gjë konfirmohet nga statistikat zyrtare të publikuara sot nga INSTAT.
Të dhënat i referohen burimeve administrative, që matin numrin mesatar të të punësuarve në sektorin privat jo-bujqësor (mesatare tremujore e llogaritur me të dhënat e listë-pagesave të Drejtorisë së Përgjithshme të Tatimeve).
Po ashtu, një tjetër e dhënë është dhe numri mesatar i të punësuarve në sektorin bujqësor, që bazohet në vlerësimet tremujore të Anketës së Forcave të Punës.
Në fund të qershorit, në vend kishte gjithsej 1.1 milion të punësuar, nga 1.15 milionë në fund të 3-mujorit të katërt 2019.
Rënia më e fortë ka qenë në sektorin privat jo bujqësor, ku u regjistruan gati 30 mijë të punësuar më pak se në fund të 2019-s, me një tkurrje prej 6%.
Ky është numri më i ulët i të punësuarve në sektorin privat jo bujqësor, që nga tremujori i tretë i vitit 2017.
Qeveria mori masa për mbështetjen e bizneseve që u ndaluan të punonin dhe atyre që nuk kishin mundësi të punonin, përmes dy paketave mbështetëse, por kjo sërish nuk e ka ndaluar hemorragjinë e të punësuarve.
Nga sektori privat bujqësor, INSTAT ka gjetur nga anketa se, nga tregu i punës kanë dalë rreth 18 mijë persona, me rënie prej 4% në krahasim me fundin e 2019-ës.
Edhe nga sektori shtetëror rezultojnë gati 2 mijë të punësuar më pak.
Në fund të qershorit 2020, rreth 44% të totalit të të punësuarve ishin në sektorin privat jo bujqësor. 40% punonin në bujqësi dhe pjesa tjetër (rreth 16%) është e punësuar në administratën shtetërore.
Të dhënat e INSTAT tregojnë se, ka një rritje edhe të punëkërkuesve të papunë të regjistruar. Numri i tyre arriti në 84.7 mijë në fund të tremujorit të dytë, ose 14 mijë më shumë në krahasim me fundin e 2019-s.
Rritja më e madhe ishte nga “Punëkërkues të papunë të regjistruar për herë të parë në zyrat e punës” (+5,178) dhe nga “Punëkërkues të papunë të regjistruar të moshës 16-29 vjeç” (3,619), që tregon një shtim të papunësisë tek të rinjtë, por edhe hyrjen në radhët e të papunëve të personave që më parë e kishin një angazhim.
/Burimi: Monitor.al/ Përshtati: GazetaReforma.com/
