Pandemia e koronavirusit në Shqipëri ka infektuar jo vetëm njerëzit dhe ekonominë, por si pasojë e mungesë së turistëve dhe rënies së konsumit të brendshëm, krizën po e ndjejnë edhe sektorë apo produkte të caktuara.
Kështu sipas të dhënave më të fundit të INSTAT për muajin që lamë pas, rënie të ndjeshme dhe tkurrje në konsum kanë njohur edhe ato që konsiderohen si “produkte luksi”, ose mallrat e akcizës.
Sipas të dhënave, mungesa e turistëve të huaj sidomos gjatë muajit gusht, e ka çuar në pikiatë importet e mallrave të akcizës, të cilët e thelluan tendencën rënëse të nisur që në fund të 3-mujorit të parë për shkak të pandemisë.
Teksa ekonomia ka tentuar t’i kthehet normalitetit, sektori i turizmit dhe në përgjithësi konsumi këtë verë, është goditur nga mungesa e vizitorëve të huaj në vend.
Referuar të dhënave zyrtare, kësaj here të Ministrisë së Financave, importi i karburanteve gjatë 8-mujorit shënoi rënie me -1,2%.
Por tkurrja ishte më e dukshme në muajin gusht, kur importet ishin 8.7% më të ulëta se në gushtin e vitit 2019.
Burimet nga tregu e lidhin këtë rënie me një kërkesë më të ulët, si rrjedhoje e kufizimeve të udhëtimeve nga jashtë.
Për të njëjtat arsye shihet të këtë rënë edhe importi i cigareve, por ka qenë edhe më e fortë.
Sipas të dhënave nga Ministria e Financave gjatë 8-mujorit importet e cigareve shënuan rënie me 14%, por gjatë gushtit ritmet e rënies u thelluan më tej, me 26% më pak se gushtin e vitit 2019.
Ecuri të njëjtë shënuan edhe importet e kafesë, të cilat shënuan rënie vjetore me 5,7 për qind në 8 mujor, por në gusht tkurrja ishte me 28%.
Burimet nga tregu pohuan se, rënia e importeve të kafesë lidhet edhe me mbifurnizimet gjatë pandemisë.
Gjithashtu në muajin gusht u vu re një ulje e importeve të birrës me 8.7%, teksa rënia në tetë mujor ishte me 4.4%. Burimet nga tregu thanë se, konsumi i birrës u lidh direkt me rënien e konsumit për shkak të numrit më të ulët të vizitorëve në vend dhe mbylljen lokaleve të muzikës në orët e vona, ku zakonisht konsumohej birra.
Rënia e importeve të mallrave të akcizës ka ndikuar negativisht të ardhurat në buxhetin e shtetit. Gjatë 8 mujorit doganat grumbulluan 11.1% më pak se vitin e kaluar në të njëjtën periudhë, ndërsa në muajin gusht hendeku ishte 15 milionë euro më pak se në gushtin e vitit 2019, ose 12.3% rënie.
Gjatë periudhës janar-korrik numri i shtetasve të huaj, që kanë vizituar Shqipërinë, ka pësuar rënie me 64.7%.
/Burimi: Monitor.al/ Përshtati: GazetaReforma.com/
