Kandidati i Partisë Demokratike për deputet në qarkun e Durrësit, Edi Paloka ka qenë në një takim me banorët në Manëz, ku ka prezantuar edhe kandidaten e zonës, Manjola Luki. Paloka ka thënë se në parlament do të jetë përfaqësues i popullit, duke zgjidhur problemet që ka çdo familje.
“Ardhja këtu është emocion dhe kënaqësi më vete. Sot kam ardhur të prezantohem tashmë si deputet i zonës tuaj, në parlament do të jem direkt përfaqësuesi juaj duke zgjidhur problemet që ka çdo familje”, ka thënë Paloka.
Kandidati democrat është ndalur më tej tek emigrimi masiv i shqiptarëve, duke thënë se për këtë jemi në garë me sirianët, kush të ikë më parë nga vendi i vet. Ai tha se beteja është për njerëzit që luftojnë për bukën e gojës, përballë një tufe që s’di ku të çojë milionat e sërish kërkon të vjedh në kurriz të shqiptarëve.
“Pas 30-vitesh shqiptarët po ikin prapë, jemi në garë me sirianët, kush të iki më parë nga vendi i tyre. Këtë duhet t’i lëmë Ramës të përfundojë? Për këtë t’i japim mandat tjetër? Beteja është për njerëzit që luftojnë për bukën e gojës përballë një tufe që nuk di ku të çojë milionat dhe kërkon prapë në kurriz të shqiptarëve të vazhdojë të vjedhë dhe poshtërojë njerëzit”, tha Paloka.
