Edi Paloka ka qenë një nga figurat më të përfolura kohëve të fundit, sidomos pas hedhjes së bojës në drejtim të kryeministrit në Parlament. Mirëpo sot, Paloka ka folur për një tjetër skandal këtë herë që përfshin Presidentin e skuadrës së Kukësit, Safet Gjicin. I ftuar në “Kjo Javë”, Paloka ka thënë se emri i Gjicit ka dalë në përgjimet e ndërkombëtarëve duke blerë vota në Kukës në favor të Partisë Socialiste. Sipas Palokës janë plotë 400 CD me përgjime të reja nga dosja ‘339’, por se nga e ka marrë këtë informacion, nuk ka dhënë asnjë detaj.
“Po e them për ju për herë të parë. Safet Gjici në Kukës ka dalë në përgjimet e shërbimeve të huaja për blerje votash. Janë 400 CD të tjera që nuk janë zbardhur tek dosja 339. A do i zbardhi kjo Prokurori? Kush t’i hetojë kjo prokuroi që është sot? Këtyre CD-ve nuk do u dihet fati nëse vazhdohet me këtë prokurori që kemi sot”– tha Paloka.
I gjendur në studio, gazetarja e ka pyetur edhe rreth mendimit të tij për djegien e mandateve të opozitës, ku nënkryetari i PD është shprehur i bindur se Rama ka për ta lënë postin në çdo lloj mënyre.
“Ne u larguam nga një parlament ilegjitim. Ditën e 16 protestës ne e morëm mesazhin nga njerëzit. Nuk kishte më akt tjetër që mund të ndërmerrnim. Ishte i vetmi reagim që mund të bënim. Ne i kemi bërë të gjitha provat. Ai parlament nuk funksiononte më. Ne e dimë që është reagim ekstrem. Rama ka blerë votat në 4 qarqe. Ky njeri është bërë pengesë për vendin. Rama do largohet se s’bën. Ky vend nuk ka zgjedhje nëse nuk largohet Rama. Rama do largohet me dhunë se vetë nuk ikën. Me dhunë nënkuptohet se nuk do marrim topat, por me të gjitha aktet që ai të largohet. Ai mund të vazhdojë të bëjë arrogantin, por do largohet”- tha Paloka.
