Ditë e sotme pritet që Kuvendi të votojë paketën “Anti-shpifje”, të propozuar nga qeveria.
Kryeministri Edi Rama në fjalën e tij, sqaroi se ky ligj është konsultuar për 1 vit rresht, ndërsa ka pasur kontakte edhe me Këshillin e Europës.
Më pas shefi i qeverisë është treguar i ashpër me drejtuesit e mediave, duke thënë se grad dhe vajza hidhen në tezgën e tyre dhe bëhen prostituta.
Rama nuk la pa thumbuar edhe deputeti e LSI, Petrit Vasilin, për të cilin tha se në 7 fjalë, 6 i ka sharje.
Kryeministri u ndal edhe tek gjyqi që fitoi Rea Xhillari me 7 portale.
Kreu i ekzekutivit komentoi edhe debatin e mbrëmshëm në “Opinion”, ku dënoi gjuhën e përdorur nga pedagogu i gazetarisë, Mark Marku.
Pjesë nga fjala e Ramës
S’kemi mundësi që t’ju themi të gjithë atyre që lexojnë shpifjet sesi është versioni i të vërtetës. Por dhjetëra sipërmarrës që detyrohen t’i paguajnë. Por si? Duke pritur siç pres unë gjyqet, ndërkohë që biznesi i tyre derisa të ketë mbaruar gjyqi të ketë falimentuar. Me djathin me miell dhe bukën me niseshte? Le të kthehemi tek përmbajtja. Së pari, kush thotë që ky është një akt unilateral i qeverisë, gënjen. Kjo është një paketë, e konsultuar 1 vit rresht. Unë kam patur kontakt edhe me Këshillin e Evropës, dhe iu kam thënë që ju se keni lexuar ligjin dhe jeni nën presionin e organizatave të rreme, si ajo organizata e rreme e Mero Bazes, se ka edhe Mero një organizatë të rreme, që e përdor hera herës për të ngritur çështje për shtypin e lirë. Apo ai që del tek Rai 3 dhe flet për dhjetëra të arrestuar në burgje. Gra dhe vajza që hidhen në tezgën e këtyre, që i bëjnë këta prostituta, këta. Punonjës të shtetit që i bëjnë oligarkë këta. Dhe kjo, s’është cështje opinionesh, se deri më dje si ka shkuar mendja njeriut t’i ndalojë këta kur shkojnë edhe në fyerjet më ekstreme. Kjo është kufizimi për të shpifur, për t’ju treguar njerëzve qindra milionat e mia në offshore, qindra pallatet e mia në Spanjë, etj, etj, që o duan të më largojnë mua në jetën publike, o të demaskohen. Dëgjoj Rudina Hajdarin që flet, dhe harron Rudina veten e vet. Ishte vajza e heroit kur mendonte si Partia, ditën kur bëri siç mendonte vetë, e pa vetë. Cila liri? Liria për të thënë u korruptove, vodhe? Këto janë akuza, dhe për këto akuza duhet të përballen, dhe ndëshkimi në këtë ligj është qesharak. Shikoj atë Peço Vasilin, del Peçi për lirinë e shprehjes, në 7 fjalë, 6 i ka sharje. Po bëjmë ligj ne të mbrojmë veten nga Peçi Vasili që del bashkohet me këta. Artur Zheji, e bëri vajzën tonë dashnore të ministrit dhe thotë do largohem nga Shqipëria. E dënoi dhe gjykata, kjo s’është për mua. Unë me këta mbijetoj dhe 100 vite të tjera, por kjo është për shoqërinë për të lehtësuar koncetratin e helmit që këta hedhin në gjakun e shoqërisë nga mëngjesi në darkë. Një tjetër është Mark Marku, që nuk lë fjalë të ndyrë pa i thënë një deputeti që e kërcënon se do t’a qëllojë me shishe. Ky është profesori i lirisë, Mark Marku, që duhet markuar me të kuqe, por ky ligj s’është për deputetin që të cojë pedagogun se iu shthur goja. Por që publiku të mësojë atë që thuhet, se a jemi të gjithë njësoj? Se të gjithë ata që merren me politikë, të kenë atë turmë atje mbi vete? Apo secili ka të drejtën të kërkojë llogari publike për atë që i thuhet? Për çfarë po flasim këtu? Ku po cënohet liria e shprehjes këtu?
