Në Komisionin e Medias po diskutohet paketa “Anti shpifje” e qeverisë.
Të pranishëm në mbledhje ishin edhe përfaqësuesit e medias.
Midis deputetëve socialistë dhe demokratë pati debate të forta.
Gjithashtu gazetari Ylli Rakipi reagoi ashpër ndaj këtij projekt-ligji.
Sipas Rakipit, ky projektligj, e vendos median online nën tutelën e dy institucioneve që i kontrollon qeveria.
Më tej ai shtoi, se ky propozim është në shkelje me Konventën për të Drejtat e Njeriut.
”Mos pëlqimi i kryeministrit është einjohur publikisht dhe e demostron nga mënyrat më të ndryshme. Ndoshta një pjesë nga ju jeni të kënaqur me daljet e tij, e liderit tonë, që përveç përmbajtjes, demonstron edhe në formë. Vishet si profeti Muhamed. Me një gjuhë denigruese, fyese, ‘qenef’, ‘hale’, ‘pusho atë qenin’, ‘atë analist’, na shan nëpër rrugët e Kasharit. Projektligjet e medias online kanë frymë fashiste dhe e vendosin median onlinë nën kontrollin e dy institucioneve që i kontrollon qeveria. Ju është dërguar një pr/ligj që ta ktheni në ligj për të ligjëruar urdhrin administrativ të Enver Hoxhës. Do të ngrihet AKEP dhe AMA e do të marrin vendime për të goditur mediat, sic kërkon lideri ynë suprem. Urdhri adminsitrativ të vihet mbi vendimin e gjykatës. Kjo po ju kërkohet zotërinj deputetë. Bëjeni, por turpi do të jetë i juaji”, tha Rakipi.
Fjalën e mori edhe gazetarja Mimoza Koçiu, e cila tha se ky projektligj bëri bashkë një numër shumë të madh mediash.
Sipas saj, prej një viti është bërë thirrje, që të tërhiqet kjo paketë, pasi dëmton lirinë e medias dhe shton censurën.
Qeveria prej 2 vitesh po përgatit një paketë të quajtur “Anti-shpifje”, e cila do të votohet në Kuvend më 19 dhjetor.
Ky propozim është pritur keq nga gazetarët, të cilët e kanë cilësuar si sulm ndaj fjalës së lirë.
Ligji parashikon gjoba dhe mbyllje të mediave, në rastet e publikimit të lajmeve të rreme.
