E ndërkohë që në vendin tonë në 24 orët e fundit u shënuan 25 raste të reja me koronavirus, një lajm i mirë ka ardhur nga Mali i Zi.
Ky shtet njoftoi këtë fundjavë hapjen e plotë nga kufizimet e pandemisë së koronavirusit.
Kryetari i Komunës së Tuzit, Nik Gjeloshaj deklaroi se vendi po shkon drejt normalitetit dhe në ditët e ardhshme do hapen edhe kufijtë me shtetet fqinje, por me disa kushte të caktuara.
Gjeloshaj i ka dhënë rëndësi faktit se Mali i Zi mbështetet tek turizmi dhe se ky është shumë jetik për ekonominë e vendit.
Nga ana tjetër, Gjeloshaj tha se janë marrë masa që operatorët turistikë të mos abuzojnë me çmimet.
Sipas tij këtë vit çmimet do të jenë edhe më të ulëta se çdo vit tjetër për të afruar sa më shumë turistë drejt Malit të Zi.
“Pas menaxhimit me sukses pritet që të kemi një sezon të sukseshëm turistik.
Sa i përket çmimeve, pasi masat e qeverisë i kanë favorizuar bizneset përmes lehtësimeve të ndryshme fiskale, kështu që këtë vit do të jenë më të lira”, u shpreh Gjeloshaj.
Nga ana tjetër, shumë vende të Europës, por edhe Shqipëria po përgatitet për hapjen totale të kufijve në prah sezoni turistik.
Të gjitha shtetet po përpiqen të ringrejnë ekonominë e vendeve të tyre, pas një krize e cila do i tregojë efektet e saj edhe për shumë muaj më mbrapa.
