Ditën e sotme Kryetari i komisionit Qendror të Zgjedhjeve Ilirjan Celibashi u ka bërë thirrje të gjitha bashkive që të përmbushin detyrimet ligjore, kur jemi vetëm pak muaj larg zgjedhjeve lokale të 14 majit. Në një postim në Facebook, Celibashi shkruan se bashkitë duhet të dërgojnë në rrugë elektronike hartat e qendrave të votimit.
Postimi i plotë:
Kërkesë me rëndësi për kryetarët e bashkive të vendit në lidhje me raportimin në KQZ të qendrave të votimit në njësitë e tyre vendore. Në vijim të bashkëpunimit dhe komunikimit mbi organizimin e proçesit zgjedhor të datës #14MAJ2023, KQZ ka administruar informacionin e ardhur në rrugë elektronike dhe postare për qendrat e votimit dhe për publikimin e ekstraktit të përbërësve zgjedhor, nga ku rezulton se jo të gjitha bashkitë kanë përmbushur detyrimin e tyre. Duke qënë në tejkalim të çdo afati, kërkohet që bashkitë të cilat ende nuk kanë përmbushur detyrimin ligjor të mësipërm të marrin masa MENJËHERË dhe të përmbushin detyrimet e tyre. Gjithashtu duhet realizuar në të njëjtën kohë edhe dërgimi në rrugë elektronike i hartave të qendrave të votimit në adresën email: [email protected]
KQZ përcaktoi në mbledhjen e shkuar se nga 7 anëtarë, 2 do t’i kishte PS, 2 PD, 1 PL dhe 1 PSD. Deri më tani, për shkak të ngërçit me vulën e PD në gjykatë, Partia Demokratike e drejtuar nga Berisha edhe në këto zgjedhje, njësoj si në 6 mars nuk do të ketë komisionerë.
Zgjedhjet lokale do të mbahen më 14 Maj 2023. Kryetari i Partisë Demokratike, Sali Berisha dhe kreu i Partisë së Lirisë, Ilir Meta kanë rënë dakord që të dilet me kandidatë të përbashkët në zgjedhjet vendore dhe kanë bërë publike listën me emrat e kandidatëve.
Ndrësa Alibeaj ka bërë të ditur se ka gati një pjesë të emrave me të cilët do të kandidojë në zgjedhjet e 14 majit. I vetmi i zyrtarizuar nga grupi i Alibeajt është Kapllanaj për Mallakastrën. PS ka në plan të rikandidojë shumë prej kryebashkiakëve aktualë, por pritet dhe emra të rinj.
