Pas thirrjeve të shumta nga operatorët turistikë, qeveria vendosi që më 1 qershor të hapë plazhin për strukturat hoteliere, por operatorët turistikë janë në kaos për shkak të vendimmarrjes së paqartë, teksa ende nuk ka një plan konkret se si do veprohet.
Disa ditë më parë Kliton Gërxhani kryetar i Shoqatës së Tur-operatorëve ka deklaruar se do të duhet të paktën edhe një muaj që të nisë realisht turizmi dhe sa më shumë vonohen protokollet si do veprohet aq më e vështirë bëhet përgatitja.
LEXO: Qeveria njoftoi hapjen e plazheve, por operatorët janë të shqetësuar: Jemi në pritje dhe në kaos
Mirëpo, teksa kanë mbetur edhe 5 ditë nga çelja e siparit, operatorët janë ende të paqartë në lidhje me protokollin.
Operatorët në Durrës po parapërgatiten për sezonin në bazë të një draft – protokolli të shpërndarë nga Ministria e Turizmit 2 javë më parë, por disa pika sipas tyre mbeten ende të paqarta.
Eduart Xhepa anëtar i Shoqatës së Turizmit në Durrës, në një intervistë për Tv Kan ka thënë se protokolli ka ekzagjerime, siç është ruajtja e distancës në det 3 metër nga njëri – tjetri, gjë e cila sipas tij është e pakontrollueshme.
“Të gjitha pikat në draft i kemi marrë parasysh dhe po i zbatojmë ne strukturat akomoduese, por s’do të thotë që sska ndonjë pikë të ekzagjeruar siç është ruajtja e distancës në det 3 metër nga njëri – tjetri. Kjo është e pakontrollueshme. Presim që këtë javë të dalë zyrtarisht dhe ne të jemi më të qartë se çfarë masash do të marrim”.
Fatos Çerenishti u shpreh se sistemimi i çadrave është nga punët e para në prag të sezonit veror, por në mungesë të protokollit zyrtar edhe kjo punë ka mbetur pezull.
Hotelet janë pajisur me broshurat informuese, higjenizues, termometrat elektronikë, maska e doreza higjienike për stafin, të gjitha këto të përkthyera në kosto shtesë.
“Duhet patjetër të mendojë të ndihmojë në formë granti, kredie të butë po janë shumë urgjente, garancia sovrane ka shumë procedura. Të gjitha këto kanë një kosto, stafi do trajnim. Të gjithë presim që puna duhet të nisë një orë e më parë, edhe për punonjësit sepse kërkojnë siguri për pagat e tyre”, thotë Fatos Çerenishti.
Po sipas draft-protokollit, të gjitha hotelet duhet të certifikohen nga Ministria e Turizmit si “strukturë e kontrolluar” për masat anti – covid, por në një kohë që nuk ka një protokoll të miratuar, nisja e sezonit më 1 qershor mbetet vetëm në dorë të operatorëve për të vepruar lidhur me situatën.
