Ish-kryeminsitri Sali Berisha ka folur sërish për përjashtimin e tij nga grupi parlamentar i PD, duke hedhur akuza të forta ndaj Lulzim Bashës dhe duke e quajtur një pabesi të rëndë veprimin e tij. I ftuar në emisionin “Zonë e Lirë”, Berisha tha se Basha bashkërendoi forcat me Ramën kundër tij dhe për vendimin e marrë e njoftoi vetëm 20 minuta para.
Berisha tregoi se e kundërshtoi në mënyrë kategorike vendimin, sepse nuk ishte tagri i Bashës. Më tej ai tha se mbledhjen e djeshme të Kryesisë së PD-së, Basha e bëri për të komunikuar vendimin e tij.
“Pabesia njerëzore thyen çdo normë dhe çdo moral. Luli bashkërendoi forcat me Edi Ramën kundër meje. Një akt të cilin e njoftoi 20 minuta para se të dalë në mesazhin e tij. Ma tha mua në telefon dhe unë e kundërshtova në mënyrë kategorike, sepse nuk ishte tagri tij një vendim i tillë. I kërkova që kundërshtimin tim të jua përcjellë të pranishmëve në mbledhje. Në fakt ai kishte paraqitur më parë mesazhin më pas shkoi për t’ua komunikuar. E bëri pa i lajmëruar. I la mbledhur për një orë, shkoi tek ata dhe i njoftoi. Pra mbledhjen e kishte bërë për t’i thënë vendimin”, ka thënë Berisha.
