Banorët e fshatit Kurdari në njësinë administrative Klos kanë dalë në protestë përpara godinës së Bashkisë, kundër ndërtimit të një hidrocentrali në zonën e tyre.
Ata paralajmërojnë se ky projekt rrezikon të shkatërrojë burimin e vetëm të jetesës, ujin që përdoret për bujqësi dhe frutikulturë.
Me pankarta në duar ku shkruhej “Pa ujë nuk ka jetë” dhe “Liri ose vdekje”, banorët kërkojnë ndaljen e menjëhershme të projektit.
Ata theksojnë se ndërtimi i HEC-it do të ndërpresë furnizimin me ujë dhe do t’i detyrojë të braktisin fshatin. Mungesa e ujit, sipas tyre, nuk është vetëm një çështje teknike, por një kërcënim i drejtpërdrejtë për ekzistencën e komunitetit.
Fshati jeton prej vitesh falë bujqësisë dhe kultivimit të pemëve, të cilat kërkojnë ujitje të vazhdueshme. Çdo ndërhyrje në rrjedhën natyrore të ujit pritet të sjellë pasoja të parikuperueshme për prodhimin dhe të ardhurat e familjeve vendase.
Një grup përfaqësuesish të banorëve është ftuar në një takim me autoritetet lokale, por takimi është zhvilluar me dyer të mbyllura dhe pa praninë e medias, duke shtuar dyshimet dhe pakënaqësinë në komunitet. Ndërkohë, tensioni mbetet i lartë.
Banorët e Kurdarit theksojnë se projektet të respektojnë të drejtën e tyre për një jetesë të qëndrueshme dhe për mbrojtjen e mjedisit nga dëmet afatgjata.
