Presidentja e Kosovës, Vjosa Osmani, mbërriti sot në Tiranë për Samitin e Komunitetit Politik Evropian dhe u prit me përzemërsi nga kryeministri Edi Rama, i cili është mikpritës i ngjarjes që ka mbledhur 47 liderë evropianë.
Në një prononcim për mediat ndërkombëtare dhe shqiptare, Osmani foli për krizën politike që pasoi zgjedhjet e parakohshme të shkurtit, duke theksuar se zgjidhja e këtij ngërçi është çështje kohe dhe domosdoshmëri për të mos dëmtuar më tej qytetarët e Kosovës.
Sa i përket dialogut me Serbinë, presidentja nënvizoi se fokusi i Kosovës në këtë moment është te raportet me Bashkimin Evropian.
Ajo kërkoi që BE të heqë masat ndëshkuese ndaj vendit të saj, për të rikthyer besimin dhe për të ruajtur besueshmërinë e vet si ndërmjetës.
