Në procesin gjyqësor për dosjen “Plumbi i Artë”, Erjon Alibej, një nga bashkëpunëtorët e drejtësisë, ngriti shqetësimin se disa media kanë prekur atë dhe familjen e tij në aspektin moral.
Gjatë deklaratës së tij para gjykatës, Alibej tha se në rast se raportimet e tilla do të përsëriten, ai do t’u kërkojë togave të zeza që të jenë të pranishëm në seancë ose ai, ose gazetarët e kronikës.
“Gazetarët duhet të kthejnë gishtin nga vetja para se të flasin për të tjerët. Jemi të shqetësuar për këtë situatë. Nëse përsëritet, do të ketë vetëm një zgjidhje: ose unë, ose ata në seancë. Nuk është se nuk duam media në gjyq, por duam që të jenë të kujdesshëm në raportimet e tyre”, tha Alibej para togave të zeza.
Reagimi i tij ka ardhur pas një deklarate të bërë nga Xhuljano Hoxha në seancën e të martës së kaluar, ku ai e akuzoi Alibej se kishte pranuar se donte të vriste Kastriot Kilen, i njohur si “Oti”, duke dhënë edhe shpjegime për arsyen, të cilat u publikuan në disa media si çështje personale dhe intime.
Alibej, ndonëse foli për transformim të deklaratave dhe çfarë ndodhi në seancë, nuk specifikoi dallimin mes deklaratave dhe raportimeve të mediave, duke theksuar vetëm shqetësimin që këto raportime kishin shkaktuar për të dhe familjen e tij.
