Kryetari i Prezencës së OSBE-së në Shqipëri, Vincenzo del Monaco interesohet për rolin e policisë në zgjedhje.
Ardi Veliu dhe Del Monaco gjatë bisedës theksuan rëndësinë e forcimit të bashkëpunimit, si dhe të asistencës e mbështetjes nga ana e OSBE-për Policinë e Shtetit, duke marrë parasysh se jemi në vit zgjedhor dhe roli i OSBE-së është mjaft i nevojshëm dhe i domosdoshëm, si në trajnime ashtu edhe për monitorimin e veprimeve të Policisë para, gjatë dhe pas procesit zgjedhor.
Veliu po ashtu theksoi se tashmë Policia e Shtetit ka krijuar standarde të larta për distancimin total nga procesi zgjedhor, si dhe garantoi kreun e Prezencës së OSBE-së se “Policia e Shtetit është e motivuar dhe e vendosur për të zbatuar vetëm ligjin, si dhe për të luftuar pa kompromis krimin e organizuar, krimin në përgjithësi dhe çdo krim elektoral, duke garantuar një ambient të qetë e të sigurt për të gjithë”.
Ambasadori Del Monaco nga ana e tij vlerësoi rezultatet e arritura nga Policia e Shtetit në luftën kundër krimit të organizuar, krimit në përgjithësi, si dhe për përballimin e mbingarkesës për shkak të pandemisë COVID-19.
Gjatë takimit me drejtorin Ardi Veliu vlerësoi si të shkëlqyer bashkëpunimin e deritanishëm me Prezencën e OSBE-së, mbështetjen dhe asistencën e dhënë prej saj për Policinë Kufitare në veçanti dhe për të gjithë Policinë e Shtetit në përgjithësi./Gazetareforma.com/
