Ndonëse gazetarët janë ‘kthyer’ në shpresën e shumë njerëzve të mbyllur në shtëpi gjatë pandemisë, si dritarja informuese se çfarë ndodh jashtë mureve të shtëpisë së tyre, duket se vetë media nuk i ka shpëtuar krizës së koronavirusit.
Vlen të përmendet se shtypi i shkruar ndërpreu aktivitetin e tij për disa javë, duke pësuar një goditje edhe më të rëndë, teksa shumë televizione kanë ndërprerë programacionin, për shkak të kushteve të krijuara.
Ndryshimet e bëra në median e shkruar, televizive, por edhe atë online, për shkak të masave kufizuese të marra nga qeveria, duket se po shkaktojnë një impakt negative mbi biznesin mediatik, teksa qeveria shqiptare nuk ka parashikuar ende asnjë paketë ndihmuese.
Gjasat janë shumë të pakta që kjo të ndodhë në të ardhmen, pasi kreu i qeverisë deri tani është shprehur skeptik ndaj një pakete të tillë, ndonëse ka marrë thirrje të shumta nga si nga “Shoqata e gazetarëve europianë”, ashtu edhe nga organizata të ndryshme, madje edhe presidenti Ilir Meta e kryedemokrati Lulzim Basha.
LEXO: Shoqata e Gazetarëve Europianë i kërkon qeverisë shqiptare paketa lehtësuse për mediat
Basha apel qeverisë: Media nuk duhet lënë jashtë ndihmës ekonomike
Për më tepër, më 25 mars bordi drejtues i AMA-s ka krijuar një paketë lehtësuese drejtuar qeverisë për median në kushtet e krizës së koronavirusit, që supozohet t’i shërbejnë si mbështetje medias audiovizive në përballimin e krizës finaciare që epidemia po shkakton, për të mos u rënduar më shumë në ditët në vijim.
Së fundmi, përfaqësuesi i OSBE-së për Lirinë e Medias, Harlem Desir me rastin e Ditës Botërore të Lirisë së Shtypit, u shpreh se media e lirë është i vetmi burim i besueshëm ku merret informacioni dhe po ashtu, media luan rol kyç në luftën kundër përhapjes së informacioneve të rreme, që janë po aq të dëmshme sa dhe vetë virusi.
Ai u bëri thirrje shteteve pjesëmarrëse të OSBE-së t’i lënë gazetarët të punojnë pa frikë apo favorizime dhe të mbështesin mediat që janë në vështirësi financiare për shkak të pandemisë.
“Lërini gazetarët të bëjnë punën e tyre pa pengesa, sigurojuni qasje në informacion dhe mbështetini mediat që janë në vështirësi financiare për shkak të pandemisë. Tani që bota gjendet në mes të një pandemie globale, nevoja për të pasur media të lirë është akoma më jetike dhe vendimtare se kurrë më parë. Vendimtare në kuptimin që na jep informacion të besueshëm për situatën shëndetësore dhe na njeh çdo ditë me vendimet e qeverisë dhe masat shëndetësore. Shëndeti ynë varet jo vetëm nga mundësia për të pasur kujdes mjekësor, por edhe nga mundësia për të pasur informacion të saktë për pandeminë, zhvillimin e saj dhe mënyrat për të mbrojtur veten e të tjerët. Po ashtu, media luan rol kyç në luftën kundër përhapjes së informacioneve të rreme. Megjithatë, kemi parë shumë Shtete t’i përgjigjen kësaj krize me masa që kufizojnë lirinë e medias dhe aftësinë e gazetarëve për të raportuar rreth pandemisë. E kuptoj plotësisht dëshirën e autoriteteve për të luftuar informacionet e pavërteta, si ato për mjekimet e rreme. Megjithatë, kjo nuk mund të arrihet duke kufizuar lirinë e medias. Thashethemet ndalohen më mirë duke siguruar qasje në burime të shumta dhe të pavarura informimi dhe jo përmes censurës. Kemi nevojë për më shumë transparencë, për më shumë përgjegjshmëri, për më shumë gazetarë të lirë për të raportuar, jo për më shumë kufizime”, tha Desir.
Pas thirrjeve të shumta, urojmë që qeveria të ndërmarrë paketën e shumëkërkuar me ngulm, teksa edhe gazetarët kanë qenë në vijën e parë të luftës gjatë gjithë pandemisë.
