Organizata Botërore e Shëndetësisë ka bërë thirrje që të gjitha vendet të punojnë së bashku për të zbuluar origjinën e koronavirust. Deklarata e bërë të premten vjen pasi Kina refuzoi një plan të dytë për më shumë kontrolle në laboratorë dhe tregje në territorin e saj.
Rastet e para me Covid-19 u raportuan në qytetin qendror kinez të Ëuhan në dhjetor 2019. Prej atëherë teoritë për origjinën e virusit kanë qenë të shumta, një ndër të cilat edhe se virusi mund të ketë dalë gabimisht nga laboratori. Megjithatë Kina i ka hedhur poshtë vazhdimisht pretendime të tillë.
OBSH këtë muaj propozoi një ndjekje të hetimeve të mëparshme në Kinë. Por Zeng Yixin, zv/ministri i Komisionit Kombëtar të Shëndetit të Kinës, tha të enjten se Pekini nuk do ta pranonte propozimin ashtu siç ishte më parë.
Kur u pyet për refuzimin e Kinës, zëdhënësi i OBSH-së Tarik Jasarevic tha në një konferencë të OKB në Gjenevë tha se kjo çështje nuk ka të bëjë me politikën e as nuk është një lojë faji.
“Bëhet fjalë për një kërkesë që ne të gjithë duhet të përpiqemi të kuptojmë se si patogjeni hyri në popullatën njerëzore. Në këtë kuptim, vendet me të vërtetë kanë përgjegjësinë të punojnë së bashku dhe të punojnë me OBSH në një frymë partneriteti”, tha ai.
Një ekip i udhëhequr nga OBSH kaloi katër javë në Ëuhan me shkencëtarë kinezë dhe tha në një raport të përbashkët në mars që virusi ishte transmetuar ndoshta nga lakuriqët e natës tek njerëzit përmes një kafshe tjetër, por që kërkoheshin më shumë studime.
