Duket se në një pjesë të mirë të vende, situata nga koronavirusi po përmirësohet dhe pak nga pak njerëzit po i kthehen jetës, sigurisht duke patur parasysh se virusi është mes tyre.
Protokollet e sjelljes janë të shumta, teksa shpresat janë tek krijimi i vaksinës që do i jepte fund luftës me armikun e padukshëm.
Mirëpo, deklarata e fundit e ardhur nga Organizata Botërore e Shëndetësisë në konferencën e sotme në Gjenevë, nuk është shumë optimiste.
Ekziston mundësia që koronavirusi t’i shtohet listës së epidemive dhe në vend që ta zhdukin, shoqëritë mund të mësojnë të jetojnë me të.
Mike Ryan, drejtori ekzekutiv i urgjencave të OBSH-së, teksa po fliste në videokonferencën e përditshme u pyet në lidhje me parashikimet për jetëgjatësinë e virusit, duke u përgjigjur se:
“Unë mendoj se është e rëndësishme ta vendosni këtë në listën e hipotezave të mundshme për të ardhmen. Ky virus mund të bëhet vetëm një tjetër virus epidemic në komunitetet tona. Dhe ky virus mund të mos zhduket kurrë. HIV nuk ka ikur, ne jemi përshtatur me të, kemi gjetur terapitë dhe kemi gjetur metodat e parandalimit, dhe njerëzit nuk ndjehen aq të frikësuar si më parë. Unë mendoj se është e rëndësishme që ne të jemi realist dhe nuk mendoj se dikush mund të parashikojë kur ose nëse kjo sëmundje do të zhduket,” tha zyrtari i OBSH.
Më tej, Ryan shtoi se shpresa e madhe është që shkencëtarët të gjejnë një “vaksinë shumë të efektshme” për t’u shpërndarë te të gjitha vendet në botë, duke i dhënë një “goditje përfundimtare këtij virusi”.
“Por kjo vaksinë në të vërtetë do të duhet të jetë e disponueshme dhe të jetë shumë e efektshme, ajo do të duhet të vihet në dispozicion për të gjithë. Dikush duhet ta krijojë atë dhe ta bëjë si duhet, që të gjithë të marrin një dozë prej saj. Ne duhet të jemi në gjendje ta realizojmë atë. Secili prej hapave që hedhim është i mbushur me sfida.”shtoi ai.
Bashkëjetesa me Covid-19 do bënte që testimi dhe gjurmimi i rasteve do të bëhen pjesë e jetës sonë, teksa ekziston mundësia që në shumë vende, një udhëzim i papritur për tu izoluar mund të vijë në çdo kohë.
Trajtimet mund të zhvillohen – por shpërthimet e sëmundjes mund të ndodhin çdo vit, dhe numri i përgjithshëm i vdekjeve do të vazhdojë të jetë i lartë.
Një hipotezë e tillë ishte formuluar më parë nga ekspertë të ndryshëm nga bota, por nuk ishte artikuluar në rrugë zyrtare.
Për më shumë lexoni artikullin e mëposhtëm:
Çfarë do ndodhë nëse vaksina kundër Covid-19 nuk krijohet kurrë dhe cili është plani B që bota ka?
