Prania e Covid-19 ka bërë që të merren masa në parandalimin e tij, ku një prej tyre ka qenë ora policore.
Prej kohësh ora policore është vendosur nga 06:00 e mëngjesit deri më 23:00 e darkës.
Ndërkohë edhe pse po prezantohet para njerëzve “dora e hekurt” me të cilën po zbatohet ora policore, përsëri disa ambiente janë më të favorizuara nga ana e autoriteteve përkatëse.
Siç e kemi parë edhe më herët, pavarësisht masave kufizuese që supozohet të jenë vendosur për të gjithë personat e subjektet, disa lokale e restorante në Tiranë, Durrës, plazh, Korçë etj, ‘kanë futur mik’ për qeverinë dhe kanë vazhduar të qëndrojnë të hapura pavarësisht situatës delikate në të cilën jemi.
Aktiviteti i tyre ka vazhduar normalisht edhe pas fashës orare të ndaluar me ligj dhe njerëzit kanë vazhduar të grumbullohen duke vendosur në rrezik jetën e tyre dhe të personave të tjerë me të cilët kanë kontakte.
Corona “ka hedhur valle” në këto lokale, ndërkohë që pjesa tjetër e tyre po falimenton për shkak të mbylljes. Që këto masa të kenë efekt, duket të zbatohen nga të gjithë dhe jo të bëhet një vesh shurdh e një sy qorr për një pjesë të subjekteve.
Përveç rrezikut të përhapjes së virusit, po bëhet gjithashtu një konkurrencë e pandershme mes bizneseve.
Kazinoja dhe bari tek hotel “Plaza”, kazinoja tek “Taivani” apo bari “Marina Bay” në Vlorë nuk e respektojnë orën policore dhe këtë shqetësim e kanë ngritur edhe vetë qyteratët.
Përgjatë gjithë kohës së pandemisë, jo vetëm ambientet e lartëpërmendura por ka pasur dhe shumë të tjera që nuk i kanë respektuar masat e orës policore.
Ndërkohë që shumë bare dhe restorante ndërpresin punën e tyre në respektim të orës policore, duke u dëmtuar ekonomikisht dhe si pasojë duke reduktuar edhe stafin, gjë e cila rrit nivelin e papunësisë në vend.
Kemi parë shpesh se si policia nuk ka marrë asnjë lloj mase ndaj disa biznesve që kanë shkelur të gjithë rregullat e pandemisë, duke nisur nga shkelja e orarit e deri tek mosrespektimi i distancës. Lidhja e drejtpërdrejtë e disa biznesmenëve me qeverinë apo edhe dhënia e parave nën dorë, i ka lejuar shumë prej tyre të vazhdojnë të lirë aktivitetin. Nga ana tjetër ata më “të dobëtit” nuk kanë mundur të bëjnë asnjë lloj manovre.
Orari i kufizimit ka ndikuar në thellimin e krizës ekonomike të këtyre bizneseve, ndërsa shteti shqiptar nuk dha e nuk vazhdon të japë asnjë lloj ndihme për t’ia lehtësuar sadopak vështirësitë e tyre financiare.
Ky standart i dyfishtë jo vetëm bëhet shkak për përhapjen e Covid-19, por gjithashtu ul besueshmërinë ndaj zbatimit të masave të qeverisë.
Kujtojmë që Komiteti Teknik i Ekspertëve vendosi në muajin tetor lënien në fuqi të masave ekzistuese anticovid. Kryetarja e Komitetit Teknik të Ekspertëve, Mira Rakacolli deklaroi se “Komiteti i Ekspertëve vendosi se megjithë këtë përkeqësim të lehtë të shifrave, niveli i masave shtrënguese do të mbetet i njëjtë”.
“Niveli i masave i përgjigjet këtyre indikatorëve. Ajo që Komiteti tërheq vëmendjen është zbatimi me rigorozitet i tyre. Nëse masat zbatohen me rigorozitet nuk ka vend për shtrëngime të mëtejshme”, – tha Rakacolli.
