Opozita ka paralajmëruar zhvillimin e katër protestave të ndara kundër qeverisë, të planifikuara brenda katër ditësh radhazi. Edhe pse aktorët opozitarë ndajnë të njëjtin qëndrim kritik ndaj zëvendëskryeministres Belinda Balluku, mungesa e koordinimit mes tyre ka hapur debate dhe kritika publike.
Sipas kalendarit të bërë publik, protesta e parë do të mbahet të enjten nga Arlind Qorri, të premten nga Agron Shehaj, të shtunën nga Adriatik Lapaj, ndërsa të dielën është paralajmëruar protesta e Partisë Demokratike.
Gazetari Bledian Koka e cilësoi këtë situatë si shqetësuese dhe qesharake për opozitën, duke theksuar se fragmentarizimi i protestave i shërben drejtpërdrejt kryeministrit Edi Rama.
“Opozita është fiks siç e do Rama, njëri e ka protestën të hënë, njëri të premten… Është shumë shqetësuese shpërndarja e këtyre protestave nga opozita, si skenari serb, përça opozitën.
Në vend të jesh ti qesharak që të del miu dhe macja në korrupsion, ne duhet t’i bëjmë gjyqin opozitës. Po më mirë të diskutojmë, sesa të mos kemi opozitë fare. Dita më e zezë në PD është kur nuk do të flitet më. Sot jam i gëzuar që në PD po zihen, po shahen, sepse do të thotë që akoma ajo parti inkurajon qoftë bazën po qoftë dhe ambiciet personale”, tha ai.
