Rikthimi i opozitës “së vjetër” në Parlament duket se nuk ka për të ndodhur.
Në një intervistë për Deutsche Welle ditën e sotme, ka folur vet liderit i Partisë Demokratike rreth kësaj çështjeje, duke mohuar plotësisht mundësinë se një gjë e tillë do të ndodhë.
Sipas Bashës tani është momenti më i mirë për t’i dhënë qytetarëve një sistem demokratik dhe për të larguar një herë e mirë qeverinë e cila është e lidhur me krimin.
Kjo sipas kreut të PD-së i shërben qytetarëve dhe jo partive, pasi deri më tani gjerat jo vetëm që nuk kanë ndryshuar, por janë përkeqësuar në dëm të popullit të thjeshtë.
“Largimi nga Parlamenti ndodhi pas shterimit të çdo mundësie për të zgjidhur në mënyrë institucionale këtë krizë të thellë legjitimiteti. Ju kujtoj që partnerët gjermanë në Bundestag dhe qeverinë gjermane i njohin këto probleme. Gjërat jo vetëm nuk kanë ndryshuar, por janë përkeqësuar. Dalja e opozitës nga Parlamenti është një dalje pa kthim, kriza politike është reale por është një mundësi e madhe jo thjesht për të larguar një qeverisje të lidhur me krimin, por për t’u dhënë shqiptarëve një sistem demokratik funksional që u shërben atyre dhe jo partive. Kam besim të madh që ky transformim që tashmë ka nisur, do të ketë mbështetje nga të gjithë shqiptarët e ndershëm. Në institucionet gjermane kemi gjetur mbështetje për këtë gjendje transformuese”, tha Basha midis të tjerash.
Mirëpo Basha përmend edhe një fakt tjetër, i cili është duke u folur së fundmi, që është çelja e negociatave në qershor për intergimin në BE, gjë për të cilën kreu demokrat thotë se nuk mund të realizoet me gënjeshtra dhe me shtet të kapur nga krimi.
“Në Evropë nuk shkohet me hilera, nuk shkohet me gënjeshtra, nuk shkohet me një shtet të kapur nga krimi. Shkohet me vlera, me të vërteta, me një shtet të çliruar nga keqqeverisja dhe me një Parlament të zgjedhur nga populli shqiptar. Kur bie vota e lirë ka rënë demokracia”, shtoi ai.
