Detaje të reja kanë dalë në dritë lidhur me operacionin e madh antidrogë të koduar “Ura”, i zhvilluar mes autoriteteve shqiptare dhe italiane, që çoi në çmontimin e një prej rrjeteve kriminale më të fuqishme që vepronte nga Shqipëria drejt Italisë.
Deri më tani, janë sekuestruar mbi 3 milionë euro cash, ndërsa në kuadër të hetimeve janë vendosur në sekuestro disa biznese dhe kompani që dyshohet se përdoreshin për pastrimin e të ardhurave nga trafiku i drogës.
Sipas burimeve hetimore, në listën e subjekteve të bllokuara figurojnë:
• Shoqëria “Marquez” në pronësi të Ervin Zeqirit
• “Felix Vinum”, që i përket Adi Çobës
• “Majestic Konstruksion”, me pronar Juxhin Drazhin
• “Portside” e Elvis Doçit
• “Dubai Inn”
• Televizioni lokal “Vlora Cable”, në emër të Nexhmedin Danajt
• Një kompani tregtare makinash, në pronësi të Olgert Shqevit
Urdhrat për sekuestrim janë lëshuar në bashkëpunim nga Gjykata e Posaçme Kundër Korrupsionit dhe Krimit të Organizuar dhe Gjyqtari për Hetimet Paraprake i Barit në Itali.
Operacioni u organizua nga Drejtoria e Qarkut Antimafia në Bari dhe SPAK, me bashkëpunimin e Eurojust në Hagë dhe Drejtorisë Kombëtare Antimafia e Antiterrorizëm në Romë.
Pasuritë e sekuestruara përfshijnë prona të paluajtshme dhe asete të tjera në Shqipëri dhe Itali, me një vlerë që llogaritet në disa milionë euro.
