Bari ishte epiqendra e shpërndarjes së sasive të mëdha të heroinës dhe kokainës që vinin nga Shqipëria dhe përfundonin në tregun pulian, duke përbërë një rrjet të gjerë trafiku transnacional me vlerë mbi shtatë milionë euro.
Sipas La Repubblica, Bari ishte vendi ku realizoheshin transaksionet e mëdha dhe shkëmbimet e parave në dorë, dokumentuar të paktën në 4.5 milionë euro.
Nga ky port niseshin autobusë që transportonin për në Shqipëri tufat me kartëmonedha për pagesën e drogës, ku disa nga bosët lokalë dyshohet të kenë lidhje me figura politike.
Operacioni Ura u zhvillua në kryeqytetin e Puglias, me drejtimin e DDA-së së Barit dhe përkrahjen e DIA-s, Interpolit, Zyrës së Ekspertëve të Sigurisë në Tiranë dhe Policisë Shqiptare.
Ky hetim u mundësua nga Ekipi i Përbashkët Hetimor, një bashkëpunim gjyqësor mes DDA-së së Barit, SPAK-ut në Tiranë dhe Eurojust-it, duke krijuar një koordinim të fortë ndërkombëtar. Prokurori i Barit, Roberto Rossi, e përshkroi këtë bashkëpunim si “të shkëlqyer”.
Janë dhënë 52 urdhra paraprakë nga gjyqtarë në Itali dhe Shqipëri, kundër personave të dyshuar për trafik ndërkombëtar të drogës, pastrim parash dhe shpërdorim detyre.
Disa nga të dyshuarit janë nga Puglia dhe lidhen me klanin Palermiti të Japigias. Në burg përfunduan Andrea Nicola Buonsante, Massimiliano Fiore, Cesare Gilberti, Luisa Gilberti, Luisa Patisso, Annalisa Ronghi, Giovanni Signorile, Angelo Zanzarelli, ndërsa Francesca Caputi është nën arrest shtëpiak, kurse Serafina Palazzo dhe Domenico De Tullio në detyrim paraqitjeje.
Hetimi zbuloi tre organizata kriminale transnacionale, duke filluar nga sekuestrimi i parë prej 3 milionë eurosh në para të gatshme në Durrës. Francesco Giannella, koordinatori i DDA-së së Barit, theksoi se një nga momentet kyçe ishte ndjekja e rrjedhës së parave që karakterizonte trafikimin ndërkombëtar.
Prokurori Ettore Cardinali shtoi se bashkëpunimi ndërkombëtar e ka bërë të mundur ndjekjen e këtyre fondeve përtej kufijve.
Gjatë operacionit u bënë sekuestrime të mëdha droge në disa “laboratorë artizanë” në Bari dhe provincë, të dedikuara për përgatitjen dhe paketimin e drogës në blloqe.
U sekuestruan 2 tonë kokainë në portin e Roterdamit (Holandë), 932 kilogramë kokainë në portin Gioia Tauro (Reggio Calabria) dhe 400 kilogramë hashash në Noicattaro (Bari).
Një element i ri në hetim ishte përdorimi i bisedave të koduara në platformën SKYECC si provë. Gjyqtari hetues Vittorio Rinaldi vuri në dukje përdorimin e teknologjive të avancuara nga trafikantët shqiptarë, të cilët disponojnë “kapacitete sipërmarrëse” dhe menaxhojnë “asete kriminale” për furnizimin e grupeve mafioze në Bari.
Masat në Shqipëri përfshinë hetimin dhe arrestimin e krerëve të familjes së fuqishme Troplini, që dominojnë në Durrës, përfshirë Elvis Docin, të njohur si Visi i Pojës, si dhe një komandant dhe një agjent policie, një avokat dhe 6 shoferë autobusësh ndërkombëtarë.
Në Itali u sekuestruan në mënyrë preventive prona dhe asete që përfshijnë 9 apartamente, 4 kompani, 7 llogari bankare dhe 3 makina. Në Shqipëri u vendosën nën sekuestro prona të ndryshme, përfshirë 2 kompani ndërtimi, 4 restorante luksoze, një agjenci pasurish të paluajtshme dhe një rrjet televiziv, me vlerë disa milionë euro.
