Shkatërrohet një grup kriminal i trafikut të drogës në Shkodër, ku në pranga ranë 4 persona. Në kuadër të operacionit të koduar “Rrjeta” u arrestuan shtetasit me inicialet H. U., 30 vjeç, banues në Shkodër, M. U. 26 vjeç, A. U., 36 vjeç dhe M. U., 72 vjeç, banues ne fshatin Mes të Shkodrës.
Këta shtetas janë kapur gjatë operacionit, në Postribë, në momentin e shkëmbimit të lëndës narkotike.
Gjatë operacionit forcat policore gjetën dhe sekuestruan në cilësinë e provës materiale:
– 14 litra vaj hashashi;
– 65.6 gramë lëndë narkotike në formë çokollate;
– Një armë gjahu, një sasi fishekësh, një sasi parash, 6 aparate celulare dhe 1 automjet.
Nën drejtimin e Prokurorisë, vijon puna për evidentimin dhe kapjen e personave të tjerë të përfshirë në këtë veprimtari kriminale. Materialet iu referuan Prokurorisë së Rrethit Gjyqësor Shkodër, për veprat penale “Prodhimi dhe shitja e narkotikëve”, “Pastrimi i produkteve të veprës penale” dhe “Prodhimi dhe mbajtja pa leje e armëve të gjuetisë dhe sportive”.
Ditët e fundit, kanë qenë të shumta arrestimet e personave në veprimtari kriminale me lëndë narkotike, fenomen që duket se është shtuar tepër së fundmi. Polica e Shtetit ka kryer me sukses një numër të konsiderueshëm operacionesh kundër kultivuesve dhe shpërndarësve të lëndëve narkotike, ndërsa operacioni “Rrjeta” i konkretizuar sot me sukses në Shkodër, duket se është thjesht i radhës.
