Avokati Spartak Ngjela ka vlerësuar aksionin e fundit të SPAK në Elbasan, ku u ekzekutuan 19 urdhërarreste dhe dy masa sigurie ndaj ish-gjyqtarëve, avokatëve dhe ish-shefit të krimeve. Ai tha se SPAK po vepron me efikasitet, duke ndikuar në uljen e kriminalitetit në vend.
“SPAK është në veprim. Krimi dhe korrupsioni kanë dëmtuar rëndë vendin, por tani po shihet një rënie e kriminalitetit që prej krijimit të kësaj strukture. Kjo është një luftë e ashpër që duhet të vazhdojë,” tha Ngjela për “Report Tv”.
Duke komentuar mundësinë e arrestimeve të tjera përmes përgjimeve nga aplikacionet Sky dhe Encrochat, ai theksoi rëndësinë e provave: “Gjithçka varet nga forca e provave. Proceset gjyqësore do të zbardhin gjithçka.”
Ngjela u ndal edhe te protesta për vrasjen e 14-vjeçarit Martin Cani, duke e cilësuar kriminalizimin e moshave të reja si një problem shqetësues që kërkon hetime të thella nga shteti. “Si arrin një i ri të bëhet vrasës? Është e rëndë dhe duhet drejtësi e plotë për këtë rast,” përfundoi ai.
