Mediat raportuan ditën e sotme se autoritetet në Itali kanë ekzekutuar operacionin e koduar “Beached”, i cili është shtrirë edhe në vendin tonë.
Në prangat e Policisë kanë rënë një grup trafikatësh që transportonin drogë me skaf nëpërmjet detit, teksa në Prokurori janë firmosur 17 urdhër-arreste, 9 prej të cilëve janë për shtetas shqiptarë.
Deri më tani 5 prej tyre janë ndaluar dhe është vendosur masa “arrest shtëpie”, ndërsa 4 të tjerë janë shpallur në kërkim.
Së fundmi, Policia e Shtetit ka reaguar për operacionin e zhvilluar në bashkëpunim me Policinë italiane.
Në një njoftim për mediat, blutë bëjnë me dije se janë sekuestruar mbi 4 ton marijuanë, armë zjarri, 0.5 kg kokainë dhe gomone.
Si prova materiale u kapën dhe sekuestruan mbi 4 ton marijuanë, 0.5 kg kokainë, 27 mijë euro, 1 gomone, 3 autovetura, armë zjarri e sende të tjera me vlerë për hetimin.
NJOFTIMI I PLOTË
Bashkëpunim i konsoliduar mes autoriteteve italiane dhe Policisë së Shtetit. Shkatërrohet një bandë italo-shqiptare që vepronte prej vitesh. Sekuestrohen ndër vite mbi 4 ton marijuanë, armë zjarri, 0.5 kg kokainë, gomone etj. Si rezultat e një bashkëpunimi të konsoliduar mes strukturave policore shqiptare dhe italiane, u bë i mundur realizimi me sukses i një operacioni të gjerë antidrogë, në kuadër të të cilit u arrestuan 17 shtetas ditën e sotme në Itali, 4 prej tyre shqiptarë, të tjerët italianë, që bënin pjesë në një rrjet trafiku ndërkombëtar narkotikësh. Në total janë 32 persona të proceduar, ndërsa hetimet kanë nisur që në vitin 2017, pasi në brigjet italiane, u kapën sasi të mëdha marijuane dhe në përfundim të hetimeve u lëshuan urdhër ndalimet për pjesëtarët e rrjetit, rezidentë në disa qytete të Italisë. Si prova materiale u kapën dhe sekuestruan mbi 4 ton marijuanë, 0.5 kg kokainë, 27 mijë euro, 1 gomone, 3 autovetura, armë zjarri e sende të tjera me vlerë për hetimin. Personat e arrestuar vepronin si organizatë e strukturuar kriminale dhe kryenin transportin, magazinimin, shpërndarjen, shitjen etj., të drogës nëpër qytete të ndryshme të Italisë e kryesisht në veri të këtij vendi. Operacioni për arrestimin e të kërkuarve i koduar “Beached”, u zhvillua gjatë natës së djeshme dhe ditës së sotme dhe në të u angazhuan njësi të ndryshme të strukturave ligjzbatuese italiane, në bashkëpunim me strukturat e Policisë Shqiptare në një bashkërendim operativ mes të dy palëve.
