Autoritetet greke kanë lajmëruar se në mega operacionin e shtrirë në 10 shtete, ku u arrestuan 30 persona, mes të cilëve 10 shqiptarë për trafik kokaine nga Amerika Latine në Europë janë edhe dy shqiptarë të arrestuar në Atikë, Greqi.
Sipas mediave greke dy shqiptarët janë arrestuar ditën e djeshme dhe aktualisht ndodhen në Atikë në pritje të ekstradimit në Itali për të vijuar procesin e përballjes me drejtësinë për akuzat që rëndojnë kundër tyre.
Shqiptarët e arrestuar në Greqi merreshin me koordinimin e trafikut të kokainës, ndërsa në banesat e tyre në momentin e arrestimit u sekuestruan armë, municione dhe peshore elektronike.
“Të arrestuarve iu sekuestruan 1 armë gjahu, 3500 euro, 2 peshore elektronike, 1 dedektor, 1 palë dylbi, doreza, shirita izolues dhe 2 celularë” thotë policia greke. Banda shqiptare importonte kokainë nga Amerika Latine në Evropë.
Operacioni ndërkombëtar antidrogë i koduar “LOS BLANCOS”, është shtrirë në disa shtete, si Itali, Shqipëri, Belgjikë, Emiratet e Bashkuara Arabe, Gjermani, Greqi, Holandë, Rumani, Hungari dhe Ekuador, për goditjen e një grupi kriminal në fushën e trafikimit të drogave të forta.
Sipas Policisë, nga hetimet ka rezultuar se një shtetas shqiptar drejtonte një kompani të quajtur “KOMPANIA BELLO”, që merrej me importimin e ngarkesave të mëdha të kokainës nga Amerika e Jugut, të financuara nga grupe të rëndësishme të trafikantëve të drogës që veprojnë në të gjithë Evropën.
Hetimet kanë nisur në vitin 2015 dhe gjatë kësaj periudhe janë mbi pesë milionë e gjysmë euro dhe pothuajse 4 tonë kokainë që janë kapur dhe sekuestruar nga Policia. Hetimet janë drejtuar nga prokurorët italianë dhe në total janë të gjitha këto shtete janë arrestuar 30 persona, mes tyre shumë shqiptarë.
