Ish-kryeministri Sali Berisha në një deklaratë për mediat, shprehu indinjatën e tij lidhur me menaxhimin e një operacioni të fundit nga SPAK dhe kritikoi ashpër kreun e SPAK, Altin Dumanin, për përsëritje të një “skeme mashtrimi”. Berisha akuzoi SPAK-un për dështimin në zbulimin e lidhjeve të qeveritarëve me krimin e organizuar dhe për mospërmbushjen e qëllimeve të operacionit.
“Partia Demokratike dënon me forcë dekonspirimin nga prokuroria dhe politika të këtij operacioni, i cili lejoi bosët e krimit të arratisen,” tha Berisha. Ai argumentoi se kjo situatë u mundësua nga paaftësia e SPAK për të mbajtur në fshehtësi detajet e operacionit, duke i lënë hapësirë figurave të rëndësishme kriminale të iknin.
Sipas Berishës, nga 50 mandate arrestimi që u shpallën, “absolutisht asnjë nga bosët e 7 familjeve apo zyrtarët e tjerë, për të cilët janë lëshuar urdhër-arrestet nuk u arrestua”. Ai vuri në dukje se kjo tregon një skenar të dështuar dhe një operacion që në fund i shërbeu vetëm për të paralajmëruar të dyshuarit.
Gjithashtu, Berisha zbuloi se mesazhet paralajmëruese për operacionin qarkulluan vetëm disa orë para fillimit të tij, duke i bërë të mundur që shumë të dyshuar të largoheshin nga vendi.
“Në këtë kontekst, ne dënojmë me forcën më të madhe dekonspirimin nga prokuroria dhe politika të këtij operacioni, që bëri të mundur shumë prej këtyre bosëve të largohen jashtë shteti, javë apo ditë përpara fillimit të tij,” theksoi Berisha në një ton të ashpër.
Berisha përfundoi me një premtim për vazhdimin e luftës kundër krimit dhe korrupsionit, duke theksuar angazhimin e Partisë Demokratike për të mbështetur çdo përpjekje për zbatimin e ligjit dhe vendosjen para drejtësisë të kriminelëve të çdo kategorie. “Edhe në papafingot më të fshehta, ata do të gjinden dhe do të kthehen në Shqipëri për të dhënë përgjigje para ligjit,” përfundoi ai.
