Forcat RENEA, me urdhër të SPAK, kanë kryer një operacion në Shkodër, duke zbuluar detaje të reja mbi ngjarjen e ndodhur më 23 gusht 2024 në Rranxë të Bushatit.
Automjeti i blinduar “Audi A8” u sulmua me armë zjarri, dhe dyshohet se në të ndodheshin Samuel Troshani dhe Izmir Sakica, të cilët janë shpallur në kërkim nga SPAK dhe mbajnë masë sigurie të vendosur nga Gjykata e Posaçme.
Operacioni i fundit ka çuar në komunikimin e masës së sigurisë për këtë ngjarje edhe në burgun e Reçit, ku ndodhen disa të dyshuar, të vetëdorëzuar më herët për një përplasje dhe kanosje me armë ndaj një anëtari të familjes Bruçi.
Ndërkohë, për masakrën e Dobraçit, ku u vranë katër persona, Gjykata e Posaçme ka lënë në burg të arrestuarin e vetëm deri tani, Gjulio Vuksanin.
Ai akuzohet për vjedhje si pjesë e një grupi kriminal dhe dyshohet se ka siguruar automjetin “Range Rover” të përdorur nga autorët në atentatin ku humbën jetën Arlind Bushati, Hamza Lici dhe bashkëshortët Bashkim dhe Flutura Basha.
Për ngjarjen në Bushat, SPAK ka shpallur në kërkim vëllezërit Andrea dhe Aleksandër Prendi, si dhe Pjetër Dragotin. Ndërkohë, mëngjesin e së martës, policia ka kryer kontrolle në disa banesa dhe biznese në Shkodër për të arrestuar personat e shpallur në kërkim.
Fillimisht, hetimet për këto dy ngjarje u drejtuan nga Prokuroria e Shkodrës, por pas disa javësh çështja i kaloi SPAK, ku po trajtohet si pjesë e një hetimi të vetëm për grupet kriminale në zonë.
