Ka zgjatur rreth një orë e gjysëm takimi i Ministrit të Brendshëm Sandër Lleshaj dhe Drejtorit të Përgjithshëm të Policisë së Shtetit Ardi Veliu me Prefektin e Qarkut Elbasan, Gledian Llatja.
Kujtojmë se përfaqësuesit organeve ligjzbatuese, zbarkuan pasditen e sotme në qytetin e Elbasanit ku u takuan me Drejtuesen e Prokurorisë së Rrethit Gjyqësor Elbasan, Enkeleida Millonai, Kreun e SHISH Elbasan si dhe me Drejtorin e Drejtorisë Vendore të Policisë Arjan Muça.
Në këtë takim u diskutua, shqetësimi dhe përgjegjësia rreth situatës aktuale të rendit dhe qetësisë publike në Qarkun e Elbasanit si dhe për marrjen e masave të menjëhershme për t’u dhënë goditjen fatale të gjitha organizatave kriminale si dhe të gjitha figurave të krimit që veprojnë në territor.
Ministri i Brendshëm Sandër Lleshaj sipas burimeve të “balkanweb” ka kërkuar nga Drejtuesi i sapoemëruar i Drejtorisë Vendore të Policisë së Elbasanit që trupa profesioniste që ai ka në dispozicion të inkurajohen për të qenë në lartësinë maksimale në kryerjen e detyrës.
Policia e Shtetit ka deklaruar se do të shkatërrojë pa mëshirë aktivitetin e të gjithë grupeve kriminale në çdo cep të Shqipërisë duke i dhënë fund të gjitha spekulimeve se krimi ka mbështetje politike.
Ndër të tjera në këtë takim u theksua se forca e ligjit do t’i godasë organizatat kriminale njëra pas tjetrës duke i dërguar para Drejtësisë.
Në përfundim të takimit mes Lleshajt, Veliut,Prefektit të Elbasanit dhe përfaqësuesve kryesorë të organeve ligjzbatuese është arritur në përfundimin se puna e të gjithëve do t’i shërbejë rritjes së parametrave të sigurisë së jetës së qytetarëve si dhe rritjes së zbulueshmërisë dhe goditjeve të forta ndaj krimit dhe kriminelëve.
