Një operacion masiv për të goditur personat e përfshirë në kultivimin e hasashit është ndërmarrë nga Policia e Shtetit ditën e sotme.
Deri më tani janë ushtruar 6724 kontrolle në të gjithë territorin, nga të cilat : 4956 në sera, 457 në tunele, 211 në ish-reparte ushtarake, 546 në ish-rezerva dhe magazina shtetërore, 249 në banesa të pabanuara, 34 në vila dhe banesa të dyshuara, 271 në objekte të ndryshme dhe territore të pyllëzuara që dyshohet se mund të shfrytëzohen për kultivim të bimëve narkotike.
Po ashtu, policia ka arrestuar 2 persona, që nuk janë të përfshirë në kultivimin e lëndëve narkotike, por në vepra të tjera penale:
-A. M., person i shpallur në kërkim për vjedhje.
-I. F., i dënuar nga gjykata për mos kallëzim krimi.
Në këtë aksion janë angazhuar 2225 punonjës policie të strukturave të Drejtorive Vendore të Policisë dhe të Policisë Kufitare.
Nga kontrollet e deritanishme nuk është konstatuar ndonjë rast i kultivimit të bimëve narkotike, ndërkohë, po në vijim të punës për parandalimin e kultivimit të bimëve narkotike, Policia Kriminale në të gjithë vendin dhe specialistët e policisë së zonave po grumbullojnë informacion në lidhje me personat me tendencë kriminale në fushën e kultivimit dhe trafikimit të lëndëve narkotike, me qëllim parandalimin në kohë të çdo tentative për të kultivuar kanabis.
Ndërkohë, kontrollet masive do vazhdojnë edhe në javët e muajt në vijim.
