Jemi vetëm pak ditë larg tetorit rozë, muajit të ndërgjegjësimit për kancerin e gjirit, dhe ndërsa në botë bëhen fushata solidariteti e ndërgjegjësimi, në Shqipëri gratë me kancer gjiri po përballen me një dramë të rëndë: mungesën e ilaçit jetik Phesgo (pertuzumab + trastuzumab).
Prej tre javësh, në Onkologjik, pacientet që duhet të marrin këtë terapi standarde janë lënë në mëshirën e fatit. Disa janë trajtuar vetëm me Herceptin, një zgjidhje e cunguar, ndërsa të tjera janë kthyer në shtëpi pa asgjë, vetëm me një frazë të ftohtë nga mjekët: “Lini numrin e telefonit, do ju marrim kur të vijë Phesgo”.
Gazetari Osman Stafa e ka bërë publik denoncimin:
“Ky është abuzim i rëndë me jetën e grave shqiptare. Në asnjë vend europian nuk do të lejohej një ndërprerje apo zëvendësim i tillë i terapisë, do të hapej menjëherë hetim penal. Ministria e Shëndetësisë Evis Sala dhe Drejtoresha e QSUT Anxhela Paparizo duhet të përgjigjen: pse mungon Phesgo, kush mori vendimin të jepet vetëm Herceptin dhe kush mban përgjegjësi për dëmin e shkaktuar tek pacientet”.
Megjithatë, asnjë reagim nuk ka ardhur. Askush nuk flet. Institucionet heshtin, sikur jeta e grave të prekura nga kjo sëmundje të mos ketë asnjë vlerë.
Tetori rozë është në prag, por ndërsa vendet e tjera organizojnë aktivitete për të forcuar shpresën dhe kujdesin ndaj grave, në Shqipëri sistemi shëndetësor shfaqet i zbrazët, i paaftë dhe abuzues. Sot po i braktis pacientet më të pambrojtura. Nesër, kur të kuptojmë dëmin, do të jetë shumë vonë.
Reagimi i plotë i Stafës:
Onkologjiku, pa ilaçe për gratë me kancer gjiri
Prej tre javësh, gratë me kancer gjiri që duhet të marrin Phesgo (pertuzumab + trastuzumab), janë lënë pa trajtimin standard.
Në disa raste, terapia është zëvendësuar me vetëm Herceptin, pra një trajtim i cunguar. Në raste të tjera, pacienteve nuk u është dhënë asgjë. Janë kthyer në shtëpi me një fjali: “Lini numrin e telefonit, do ju marrim kur të vijë Phesgo”.
Ky është abuzim i rëndë me jetën e grave shqiptare. Në asnjë vend europian nuk do të lejohej një ndërprerje apo zëvendësim i tillë i terapisë, do të hapej menjëherë hetim penal.
Ministria e Shëndetësisë Evis Sala dhe Drejtoresha e QSUT Anxhela Paparizo duhet të përgjigjen:
Pse mungon Phesgo? Kush mori vendimin të jepet vetëm Herceptin? Kush mban përgjegjësi për dëmin e shkaktuar tek pacientet?
Askush nuk flet!
Të gjithë heshtin!
Deri kur?
Deri kur të keqen ta kemi mbi shpinë?
Do jemi vonë! Shumë vonë!
Erdhi tetori rozë, dhe ilaçe për gratë me kancer nuk ka! Emrin ia vini vetë!
