Varianti i ri i Covid-19, i quajtur Omicron ka ngjallur shqetësimin e të gjithë vendeve të botës.
Anglia ka marrë masa duke bërë sërish të detyrueshme maskën për qytetarët që udhëtojnë në transportin publik dhe futen në dyqane.
Kjo është konsideruar si një masë paraprake për të ngadalësuar përhapjen e variantit të ri të COVID-19, Omicron.
Gjithashtu për njerëzit që mbërrijnë në Mbretërinë e Bashkuar nga vende të tjera duhet të bëjnë një test PCR si dhe do të vendosen në karantinë.
Boris Johnson pritet të paraqesë planet për programin e dozës përforcuese në Angli në një konferencë për shtyp ditën e sotme. Të hënën qeveria njoftoi se të gjithë personat mbi 18 vjeç do të marrin një dozë përforcuese, ndërsa fëmijët e moshës 12 deri në 15 vjeç do të marrin dozën e dytë.
Sipas të dhënave deri më tani, Omicron ka një rrezik më të lartë të ri-infektimit. Por sipas shkencëtarëve do të duhen rreth tre javë përpara se të kuptojmë se si varianti ndikon në efektivitetin e vaksinave. Më 26 nëntor, Organizata Botërore e Shëndetësisë tha se Omicron, që fillimisht u identifikua në Afrikën e Jugut, ishte “variant shqetësues”. Zyrtarët në Afrikën e Jugut kanë thënë se 90 për qind e rasteve të reja janë me varaintin Omicron, që ka numër të madh të mutacioneve.
