Holta Zaçaj, Kryetare e Gjykatës Kushtetuese, në emisionin ‘Log.’ në News24, deklaroi se nuk ka qenë në dijeni nga Gjykata e Lartë për fundin e mandatit të saj, por ka mësuar për këtë nga mediat.
Ajo vuri re se kishte pasur një pritshmëri në publik se mandati i saj do të përfundonte më 10 mars 2025.
Sipas Zaçajt, kjo pritshmëri buron nga fakti që Gjykata e Lartë është një nga organet që emëron dhe ajo është anëtare e Kushtetueses e emëruar nga Gjykata e Lartë.
Ajo shtoi se kur hapen vakancat nga Gjykata e Lartë, janë përcaktuar data të sakta për fillimin dhe përfundimin e mandatit.
“Neni 129 i Kushtetutës thotë se gjyqtari kushtetues e nis detyrën kur bën betimin dhe e vazhdon atë për 9 vjet”, tha Zaçaj.
Ajo tha se në asnjë rast mandati i një anëtari të Kushtetueses nuk ka përfunduar në datën që i ka përfunduar anëtarit paraardhës në këtë Gjykatë.
“Pra nëse Vitore Tushes i ka përfunduar mandati në datën 10 mars, kjo nuk ka qenë nnjë datë e mbarsur nga paraardhësi i vet”, tha Zaçaj. Ajo tha se mandati i saj, referuar Kodit të Procedurës Civile, përfundon në datën e fundit të vitit pasardhës, pra në 31 dhjetor 2025.
