Kreu i Grupit Parlamentar të Partisë Demokratike, Gazment Bardhi, iu përgjigj Kryeministrit Edi Rama përmes një postimi në rrjetet sociale, duke publikuar për herë të parë përgjigjen e kreut të Prokurorisë së Posaçme (SPAK), Altin Dumanit. Bardhi deklaroi se çështja e Xibrakës është rihapur për shkak të kallëzimit të tij dhe akuzoi Kryeministrin për përhapje të gënjeshtrave.
“Vëllai i Olsit vazhdon me gënjeshtrat ditore, duke përhumbur në nocione juridike që as i kupton dhe as nuk mund ti kuptojë,” shkroi Bardhi. Ai konfirmoi se kishte bërë kallëzim ligjor për rihapjen e çështjes së Xibrakës, e cila kishte qenë e mbyllur nga prokuroria që nga viti 2018.
Duke iu drejtuar Kryeministrit, Bardhi tha: “Po morë budalla po kallëzim kam bërë! Lexo përgjigjen e drejtuesit të prokurorisë së Posaçme z. Altin Dumani!” Ai theksoi se kallëzimi ishte bërë sipas kërkesave ligjore dhe kishte sjellë rihapjen e çështjes penale 335/1-2016, e cila tani mban numrin 88-2024.
Bardhi e mbylli postimin me një paralajmërim për Ramën, duke i kërkuar të ndryshojë strategji dhe të ‘kujdeset’ për narkoautomjetin me targa AA 653 DM. “Tani mban nr. 88-2024, që do të shenjojë gjatë gjithë jetës dhe duhet ta mbash mend mirë! Deri atëherë, ndrysho strategji, të fala Olsit dhe kujdes narkoautomjetit me targa AA 653 DM!”
