Shqipëria, pavarësisht bumit turistik dhe zhvillimeve që promovon qeveria, përballet me një problem serioz: një pjesë e madhe e popullsisë vuan për bukë.
Sipas një raporti të Organizatës së Ushqimit dhe Bujqësisë (FAO) të Kombeve të Bashkuara, 32.2% e familjeve shqiptare përjetojnë pasiguri ushqimore të moderuar, duke e vendosur vendin tonë në krye të listës si shtetin më të prekur në Europë.
Në këtë renditje, pas Shqipërisë vjen Maqedonia e Veriut me 20.2%, ndërsa Bosnja dhe Serbia shënojnë përkatësisht 13.3% dhe 13%.
Gjendja është edhe më shqetësuese për ata që vuajnë nga pasiguria e rëndë ushqimore, pasi raporti tregon se mbi 8.2% e popullsisë shqiptare gjendet në këtë situatë, një përqindje dukshëm më e lartë se në çdo vend tjetër të rajonit, ku kjo normë nuk i kalon 4%.
