Organizata e Kombeve të Bashkuara ka thënë se është duke u përgatitur për një eksod të mundshëm nga Afganistani, me të paktën deri në gjysmë milioni refugjatë më shumë deri në fund të vitit 2021.
OKB tha se aktualisht ka një fluks të njerëzve që largohen përtëj kufijve të Afganistanit dhe bëri me dije se po parashtron plane emergjente që të menaxhojë situatën, ndërsa kriza në vend thellohet
“Urgjenca humanitare aktualisht është brenda Afganistanit. Kjo është padyshim një situatë vërtet dinamike. Ne jemi duke u përgatitur për rreth 500,000 refugjatë të rinj në rajon. Ky është skenari më i keq”, u tha gazetarëve Kelly Clements, zëvendës komisionere e lartë e UNHCR -së.
Ajo theksoi në veçanti nevojën për të rritur mbështetjen për vendet fqinje që tashmë strehojnë më shumë se 2.2 milion refugjatë afganë, dhe që së shpejti mund të shohin një fluks të ri.
Edhe para se talibanët të vinin në pushtet në Afganistan gati dy javë më parë, situata humanitare në vend ishte përkeqësuar në mënyrë dramatike. Gjysma e popullsisë tashmë kishte nevojë për ndihmë humanitare dhe gjysma e të gjithë fëmijëve nën pesë vjeç vlerësohej se ishin të kequshqyer rëndë.
Një rritje e dhunës që nga fillimi i vitit ka bërë që afro 560,000 afganë të largohen brenda vendit, duke iu bashkuar rreth 2.9 milionë njerëzve të zhvendosur brenda vendit të regjistruar tashmë në Afganistan në fund të vitit 2020, tha UNHCR.
Më shumë se 80% e të zhvendosurve në vitin 2021 kanë qenë gra dhe fëmijë.
Ndërkohë, mijëra njerëz janë grumbulluar në aeroportin e Kabulit në përpjekje për të ikur. Një zëdhënës i talebanëve i tha Reuters se grupi nuk po siguronte ushqim për njerëzit në aeroport sepse kjo do të çonte në mbipopullim të mëtejshëm. Ai tha se ata duhet të kthehen në shtëpitë e tyre.
