Një gjykatë në Turqi dënoi me 9 vite e 8 muaj burg, udhëheqësen e Partisë Republikane për Stambollin, Canan Kaftancioglu.
Kjo e e fundit u akuzua se ka fyer presidentin turk Recep Tayip Erdogan në rrjetet sociale, si dhe ka përhapur propagandë terroriste.
Kaftancioglu, po e paguan shtrenjtë fitoren në Stamboll të Partisë Republikane, në zgjedhjet e fundit lokale, shkruajnë mediat e huaja.
Mbi të rëndojnë 5 akuza, bazuar në komentet e saj në Twitter, të cilat janë “Propagandë terroriste”, “Fyerje ndaj kreut të shtetit”, “Fyerje ndaj një zyrtari”, “Fyerje ndaj Republikës së Turqisë” dhe “Nxitje për urrejtje”.
Kryetarja e PR në Stamboll rrezikoi që të dënohej me 17 vite burg.
Mbështetësit e saj e kanë quajtur gjyqin politik dhe ndëshkim për rolin e saj në fitoren e zgjedhjeve lokale në Stamboll.
Ata ishin të shumtë në numër jashtë gjykatës, ndërsa brenda po zhvillohej gjyqi ndaj saj.
Kaftancioglu konsiderohet se arkitektja e fitores së madhe të Stambollit, ku Ekrem Imamoglu mposhti kandidatin e Erdogan në mars dhe më pas në qershor, pas ripërsëritjes së zgjedhjeve.
