Pas shpalljes së pandemisë, Organizata Botërore e Shëndetit nuk është “kënaqur” me përpjekjet e vendeve të prekura për parandalimin e Coronavirusit.
Së fundmi, drejtori ekzekutiv i OBSH, Tedros Adhanom Ghebreyesus, u ka bërë thirrje të gjitha vendeve të prekura që të përmirësojnë programet e tyre të testimit.
“Bëni testime, testime dhe vetëm testime pasi kjo është mënyra me e mirë për të ngadalësuar përhapjen e pandemisë së Coronavirusit.”
Më tej, Ghebreyesus u shpreh:
“ Ne kemi parë përshkallëzim të masave të marra për të siguruar distancim social, si mbyllja e shkollave, anulimi i eventeve sportive. Por nuk kemi parë masa urgjente të marra për bërjen e testeve, izolimin dhe gjetja e kontakteve të prekur, që është edhe masa kryesore për t’u përgjigjur ndaj Covid-19.”
Sipas OBSH pa kryerjen e testimeve, rastet nuk mund të izolohen dhe zinxhiri i infeksionit nuk mund të thyhet.
Në rang botëror deri tani janë shënuar 6,717 viktima dhe janë regjistruar 175,871 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
