OBSH paralajmëron se në vitin 2022 mund të mungojnë shiringat e nevojshme për injektimin e vaksinave kundër COVID-19.
Diçka e tillë pritet të ndikojë në të gjitha fushatat e vaksinimit dhe të rrezikojnë jetën e qytetarëve.
“Bota jo vetëm që mund te përballet me mungesën e vaksinave për të luftuar COVID-19, por mund të përballet me një deficit prej 1 deri në 2 miliardë shiringash në vit,” – njoftoi OBSH.
Paralajmërimi vë në dukje një nevojë prej më shumë se 20 miliard shiringash në të gjithë botën, të cilat do të duhen gjatë vitit 2022 për vijimin e vaksinimit.
Ekspertët e OBSH-së nënvizuan se agjencitë kombëtare të shëndetit duhet të regjistrojnë shumë më herët nevojat e tyre për shiringa për të shmangur “problemet në tregje” të pajisjeve mbrojtëse.
Gjithashtu mungesa e shiringave mund të vonojë vaksinimet e rregullta apo praktika të tjera shëndetësore, si dhe mund të inkurajojë ripërdorimin e shiringave dhe ageve, veçanërisht në vendet më të varfra.
Kujtojmë që në javët e fundit janë rikthyer kufizimet ne Evropë dhe qytetarëve u është kërkuar certifikata e vaksinimit.
Edhe Islanda përforcoi masat anti-COVID, duke kufizuar grumbullimet dhe bërë të detyrueshme mbajtjen e maskës. 89% e popullsisë mbi 12 vjeç rezulton tërësisht e vaksinuar, por vendi ka regjistruar 179 raste të reja në 24 orët e fundit, një rekord që nga nisja e pandemisë.
Ndërkohë, Sllovenia urdhëroi një regjim më të rreptë kujdesi për të gjitha aktivitetet, përfshirë punën në distancë ku është e mundur, por edhe rroga më të larta për infermierët.
Ndërkohë në Austri, vaksinimet po kryhen me shpejtësi pasi kufizime të reja do të hyjnë në fuqi të hënën.
Vetëm certifikata e vaksinimit ose e shërimit nga COVID do të lejojë hyrjen në vende publike dhe evente me mbi 25 persona.
