Varianti Delta i koronavirusit është duke u përhapur me shpejtësi dhe gjatë muajve të ardhshëm pritet të jetë edhe lloji dominues i virusit. Diçka të tillë e ka deklaruar Organizata Botërore e Shëndetësisë në azhurnimin e saj të përjavshëm epidemiologjik.
Delta, e cila u zbulua për herë të parë në Indi, tani është regjistruar në 124 vende – 13 më shumë se javën e kaluar – dhe tashmë përbën më shumë se tre të katërtat e ekzemplarëve të sekuencuar në shumë vende të mëdha, ka thënë OBSH.
“Pritet që Delta të konkurrojë shpejt me variante të tjera dhe të bëhet linja kryesore qarkulluese gjatë muajve të ardhshëm”, deklaroi agjencia shëndetësore e OKB.
Nga tre variantet e tjera shqetësuese të koronavirusit Alpha, zbuluar së pari në Britani, është raportuar në 180 territore (gjashtë më shumë se javën e kaluar), Beta, zbuluar së pari në Afrikën e Jugut, në 130 (shtatë më shumë) dhe Gamma, zbuluar për herë të parë në Brazil, në 78 (tre më shumë).
Sipas sekuencave të SARS-CoV-2 të paraqitura në nismën globale të shkencës GISAID gjatë katër javëve deri në 20 korrik, përhapja e Delta tejkaloi 75 përqind në disa vende. Këto përfshinin Australinë, Bangladeshin, Botsvana, Britaninë, Kinën, Danimarkën, Indinë, Indonezinë, Izraelin, Portugalinë, Rusinë, Singaporin dhe Afrikën e Jugut.
“Provat në rritje mbështesin transmetueshmërinë e rritur të variantit Delta krahasuar me variantet e tjera. Sidoqoftë, mekanizmi i saktë për rritjen e transmetueshmërisë mbetet i paqartë”, ka thënë më tej OBSH.
