Në pesë vitet e ardhshme, ekziston një mundësi 80% që bota të përjetojë një vit me temperaturën më të lartë të regjistruar ndonjëherë, sipas një raporti të ri nga Organizata Botërore Meteorologjike.
Skenari përfshin pasoja të rënda si thatësira ekstreme, përmbytje dhe zjarre në pyje.
Për herë të parë, shkencëtarët vlerësojnë një mundësi, ndonëse të ulët, vetëm 1% që para vitit 2030 bota të arrijë një temperaturë 2°C më të lartë se epoka paraindustriale. Kjo ishte dikur e paimagjinueshme në një horizont pesëvjeçar.
Raporti sinjalizon se periudha 2025–2029 ka një shans 70% që temperatura mesatare globale të jetë më shumë se 1.5°C mbi nivelet paraindustriale, një prag kritik i Marrëveshjes së Parisit për klimën.
Ky skenar nuk nënkupton automatikisht thyerjen e objektivit të marrëveshjes, që matet me një mesatare 20-vjeçare, por vjen si paralajmërim i fortë.
Ngrohja nuk do të shpërndahet në mënyrë të barabartë. Arktiku do të përballet me dimra që ngrohen mbi 3 herë më shpejt se pjesa tjetër e globit, për shkak të shkrirjes së akullit detar që redukton reflektimin e nxehtësisë.
Amazonia rrezikon më shumë thatësira, ndërsa Evropa Veriore, Azia Jugore dhe rajoni i Sahelit pritet të përjetojnë reshje më intensive.
“Është befasuese të themi që një rritje prej 2°C është tashmë në horizont, sado e vogël mund të jetë mundësia”, tha Adam Scaife nga Zyra Meteorologjike britanike.
Leon Hermanson, një tjetër autor i raportit, vlerësoi se viti 2025 ka gjasa të renditet ndër tre më të nxehtit të matur ndonjëherë. Ndërkohë, Chris Hewitt nga OBM paralajmëroi për rrezikun në rritje të valëve të të nxehtit dhe ndikimin që do të kenë mbi shëndetin publik.
Sipas tij, ende ka kohë për të frenuar ngrohjen, por kjo kërkon ulje të menjëhershme të emetimeve nga nafta, gazi dhe qymyri.
